Артистлар татар телен яклап урамга чыкты: “Халык татар концертларына йөрми башларга мөмкин бит”

Татар теленең язмышы өчен тел белгечләре генә түгел, эстрада артистлары да хафалана башлады. Кичә җырчыларның “Туган тел” җырын башкарган аерым видеолары бөтен интернет челтәрен шаулатты. Иң беренче булып моны җырчы Фирдүс Тямаев башлады, аннан башкалар да бу чарага кушылды.

Әмма артистлар татар теленә багышланган видеолар яздыру белән генә чикләнеп калмады, алар Казанның Бауман урамындагы “Йолдызлар аллеясы”нда  очрашу оештырды. Бу хакта алдан ук хәбәр ителгәч, флешмобка татар журналистлары, укытучылар һәм студентлар да килде.

 

“Монда җыелуыбызның сәбәбе – барлык артистлар, иҗатташ дуслар белән флешмоб, ягъни җыр яздыру. Йөрәк елый, йөрәк әрни. Көннән-көн күңелсез хәбәрләр килә. Татар телен сакларга, дигән тема күптәннән бара. Чыдый алмагач, бүген барлык артистлар белән гимныбыз булган “И, Туган тел” җырын җырладык. Дөресен генә әйткәндә, сүз таба алмыйм, йөрәккә авыр. Бүген иртәдән бирле өч студиягә бардым, берсендә бер җыр яздыра алмадым. Башта һаман шушы тема. Минем улым бар, киләчәктә тагын балаларыбыз булыр дип уйлыйм. Бу флешмобка татар халкы, татар милләте битараф калмас дип өметләнәм”, - диде "Татар-информ" агентлыгына Фирдүс Тямаев. Ул туган телгә багышланган эчтәлекле шигырь укыды.

Очрашуга җыелган артистлар арасында Илсөя Бәдретдинова, Филүс Каһиров, Ләйсән Мәхмүтова, Зөлфәт Зиннуров, Дилә һәм Булат Нигъмәтуллиннар, Салават Миңнеханов һәм Гүзәлем, Айрат Ильясов, Булат Бәйрәмов, Айсылу Лерон, "Фәридә-Алсу", Сиринә Зәйнетдинова һәм башкалар бар иде. Барысы да татар теленең язмышы өчен куркуын белдерде.

“Татар теле турындагы аудиохәбәрне ишеткәч, шаккатым! Мин үзем 90нчы елларда шулай укыган бала. Ләкин гөрләп торган бүгенге Татарстанда мондый хәлнең булуы мине шаккатырды. Бик кайгырам. Болай булырга тиеш түгел. Без үз телебезне сакларга, үз телебезне белергә тиеш. Телебез факультатив булып калмасын иде, дигән теләк белән килдек без. Интернеттан ишетмәгән булсам, проблеманың шулкадәр зур булуын белмәс идем. Татар теле дәресләренең сәгатен киметәләр, дип ишеттем, әйе. Ләкин кайбер районнарда бөтенләй бетереп баралар, дигән сүзләр килеп иреште. Бу – котычкыч”, - дип күз яшьләрен тыя алмады Ләйсән Мәхмүтова.

Салават Миңнеханов белән Гүзәлем тел проблемасы турында иң беренче Гүзәлемнең укытучы булып эшләүче әнисенән ишеткән. “Без – артистлар туган телне саклау темасына ватсапта төркем ачтык. Андагы хәбәләрне укыйм, тыңлыйм да, татар укытучылары татар мәктәпләрендә бу мәсьәләне бөтенләй күтәрмиләр. Алар – сукыр песиләр сыман, ярдәм итүчеләре юк, аларны прокуратура кыса. Артистларның интернетта язылучылары күп булганга күрә, бу темадан мәгълүмати “бомба” ясарга телибез. Бүген хастаханәгә баргач, татар апалары белән сөйләштек. Алар бу хакта бөтенләй хәбәрдар түгел икән. Әгәр без хәзер әлеге теманы күтәрмәсәк, татар теле дәресләре кыскартылып, инде 10 елдан соң, гомумән, укытылмау ихтималы бар. Халык руслашып, татар концертларына да йөрми башларга мөмкин бит. “Нигә без татар җырларын тыңларга тиеш?”, - дип әйтмәсләрме? Бүгенге көндә күп җирдә татарча сөйләшмиләр. Кибетләргә “Исәнмесез!” – дип килеп керсәк, русча сәламлиләр”, - диде Салават белән Гүзәлем.

Күрешеп үзара фикер алышканнан соң, артистлар бергәләшеп "Туган тел" җырын башкарды. Мишәр каны кызды булса кирәк, Фирдүс тыпырдатып бии үк башлады. Татар телен саклау теләге белән җыелган артистлар "Без татарча сөйләшәбез, без татарча җырлыйбыз, без татарча укыйбыз һәм язабыз!" дигән сүзләр әйтеп таралышты 



Фото: Салават КАМАЛЕТДИНОВ
сылтама: Интертат

 

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (0)
Cимвол калды:
Хәзер укыйлар
  • Балдаклар, туй күлмәге калды, ә мин... Сүземне ерактанрак башлыйм әле. Әти үлгәндә мин әле тумаган да булганмын – әни 7 айлык корсаклы килеш калган. Аңа бу вакытта нибары 21 яшь булган...
    7478
    2
    51
  • Рәхмәт, әнием! Аның ирен үтереп ташладылар. Дөресрәге, үләр дәрәҗәгә җиткәнче кыйнап ыргыттылар... Аңсыз гәүдәсен өйләреннән ике йөз метрлар чамасы җирдә, барак кебек шыксыз йортларның пычрак ишегалдыннан таптылар...
    4343
    0
    34
  • Бар җылымны сиңа бирәм, әни... Әнигә бар җылыңны да, назыңны да, яратуыңны да бирәсең, чөнки ул әни, һәм башкача уйлау, яшәү мөмкин түгелдер... Ә үз әниең булмаса?! Кемгә бүләк итәргә? Сине ничек бар шулай кабул итә торган кем бар тагын?! Әни бар! Иремнең әнисе!
    2254
    0
    33
  • Синнән башка беркем кирәкми Нурзидә белән Рәдиснең балалары юк. Күп еллар юк инде. Нурзидә моның белән күптән килеште. Рәдис тә килешкән кебек булган иде... 
    3048
    1
    31
  • Бергә булырга язмаган безгә... Хәзер аңлыйм: мин бик тырыш, яхшы укучы бала булганмын. Һәм шуның өстенә соң өлгергәнмен. Мәктәптә кайберәүләр бишенче класстан ук егетләр белән аралашып, егет сөйгәнгә исләрем китеп карый идем. Артык хисләнеп тормыйча гына дөньяны җигелеп тартучы әти-әни үрнәге дә шул булгандыр. Алар артык мәхәббәт маҗараларыннан башка гына, димләп өйләнешкән кешеләр иде. Егет сөю бер оят эш төсле тоелган миңа.
    2555
    0
    16
Реклама
Соңгы комментарийлар
Реклама
«Татар мамык шәле» бренды нәрсә ул?
«Татар гаиләсе / үрнәк алыгыз»
«Азат хатын» күргәзмәсе – Кабан күле буенда
«Сөембикә»нең яңа саны һәм... балчык
Әлфия Миңнуллина: «Әни Казанга яланаяклы кыз булып килгән иде, яланаяк мәңгелеккә китеп бара...»
Фарфор буенча рәссам Римма Газалиеваның шәхси күргәзмәсе
Укучыга таба яңа адым: «Сөембикә»нең февраль санын тәкъдим иттек 
Венера Ганиеваның ире, тавыш режиссеры Камил Фәйзрахмановны соңгы юлга озату
Беренче дулкын. Өмет, курку, хисләр
Татарстан журналистикасы тарихы – фотоларда