Казакъстанннан бер төркем начар күрүче велосипедчылар Парижга сәяхәт кылырга чыккан. Алар Казанда да тукталды.
Бер ай эчендә 5 мең чакрым юл, 30 шәһәр һәм 6 ил аша узарга. “Спортка чикләр юк” социаль проект кысаларында Парижга юлга кузгалган Казакъстан велосипедчылары алдында әнә шундый бурыч тора. 16 кешедән торган төркемдә начар күрүчеләр һәм бөтенләй күрмәүчеләр дә бар. Алар өчен махсус велотандемнар алынган. Анда ике кеше утырып сәяхәт итә ала. Спортчылар Казакъстан, Россия, Беларусь, Польша, Германия чикләрен узып Франциягә бара. Алар шул рәвешле дөнья күрергә тели, ә иң мөһиме, төркемдә инклюзив мөнәсәбәтләр корып, бар кешенең дә хыялын тормышка ашырырга хокукы барлыгын расламакчы. Ә ул Парижны күрү генә түгел. Дөньяны тавыш, тоемлау һәм тәм аша гына кабул иткән Илья Фәткулин сәяхәттә үзенең икенче ярын табу турында хыяллана. Ул Казанның сукырлар өчен җайлаштырылган иң яхшы шәһәр булуын әйтә. Тавышлы светофор, пандуслар, тоемлы юлларны төшереп, ил хөкүмәтенә алып кайтып күрсәтмәкчеләр. Шулай итеп, үзләрендә уңайлы мохит тудыру өчен халыкара тәҗрибәне өйрәнәләр. Казан - тарихка бай шәһәр, безне кочак җәеп каршы алды, диләр. Татарстан башкаласында ел саен үткән велойөрешкә дә кушылмакчылар. Спортчылар республикада юлларның төзеклегенә дә игътибар иткән.
Сәяхәт барышында бер уңайсызлык белән очрашканнар: юл иминлеге хезмәткәрләре бер полосалы юлларда велосипед белән йөрергә рөхсәт бирми икән. Проект җитәкчесе Бәхтияр Базарбәков киләчәктә дөньякүләм сәяхәткә чыкканда ике якта велоюллар булган киң трассалар буйлап барырбыз дип өметләнә.
Комментарий юк