«Сез – иң затлы журнал...»

«Сөембикә» журналы Әгерҗе районының иң ерак авылларының берсендә – Исәнбайда булып, авыл халкы белән очрашып кайтты.
«Сезнең килү – безнең авыл тарихы өчен зур вакыйга», – диделәр алар. Хәер, редакция хезмәткәрләре белән очрашуга тирә-күрше авыллардан – Киңкетаңнан, Кадыбаштан, Әгерҗенең үзеннән дә килгәннәр иде. Ижау шәһәрендә чыгучы «Яңарыш» газетасы журналистлары да бу очрашуга махсус кайтканнар булып чыкты.

Очрашу башланыр алдыннан Мәдәният йорты фойесында «Сөембикә» журналы редакциясе оештырган кул эшләре күргәзмә-ярминкәсе дә эшләде. Килүчеләр Альмира Борханова теккән яулыкларны, затлы җилетларны, Наталья Саярова иҗат иткән шамаилләрне, бизәнү әйберләре, милли бизәкле савыт-саба сатып ала алдылар. Татарстан китап нәшрияты авыл халкына үзендә басылган китапларны тәкъдим итте.

 Очрашу гаҗәеп җылы һәм ихлас узды. Ул «Өмет» һәм «Ләйсән» ансамбльләренең чыгышлары белән үрелеп барды. Журнал турында фикерләр шактый күп булды, тәкъдимнәр дә байтак яңгырады. «Затлы булганыгыз, гореф-гадәтләрне саклаганыгыз, язмаларыгызның камиллеге, теле өчен үз итәбез сезне» – бу сүзләрне чыгыш ясаучыларның күбесе кабатлады. «Авыл халкы укудан туктаганы юк, мин яздырып алган «Сөембикә»не тирә-күршеләрем, туган-тумачаларым, таныш-белешләрем дә укый. Ул миңа шактый таушалып кире кайта», – диючеләр дә булды.

«Әгерҗе хәбәрләре» газетасының баш мөхәррире Рәмзия ханым Зарипова: «Берәр бәйрәм җитсә, бүләк эзләп баш вата идем. Кибет киштәләре тулы булса да ни алырга белми аптырыйсың. Хәзер мин якыннарыма «Сөембикә» журналына подписка бүләк итәм. Алты ай буе килеп, куандырып тора ул аларны. Ияләштеләр инде: «Бәйрәмгә «Сөембикә» буладыр бит?» – дип сорап кына торалар», – дип сөйләде.

Әгерҗе Казаннан шактый ерак, әмма «Сөембикә» журналы тарихында аның үз эзе бар. Озак еллар редакциядә эшләгән каләмле, исемле журналистлар – Роза Камалетдинова (Мулланурова), Филисә Хәкимова, Нурсөя Шәйдуллина, Зәлидә Әкбәрова, Лариса Маликова  һәммәсе дә Әгерҗе төбәгеннән. Аларның һәрберсе – якташларының горурлыгы.
 
 
 
 

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (0)
Cимвол калды:
Хәзер укыйлар
Реклама
Соңгы комментарийлар
Реклама
«Сөембикә»нең яңа саны һәм... балчык
Әлфия Миңнуллина: «Әни Казанга яланаяклы кыз булып килгән иде, яланаяк мәңгелеккә китеп бара...»
Фарфор буенча рәссам Римма Газалиеваның шәхси күргәзмәсе
Укучыга таба яңа адым: «Сөембикә»нең февраль санын тәкъдим иттек 
Венера Ганиеваның ире, тавыш режиссеры Камил Фәйзрахмановны соңгы юлга озату
Беренче дулкын. Өмет, курку, хисләр
Татарстан журналистикасы тарихы – фотоларда
Бу – безнең уртак тарихыбыз
Журналыбыз архивыннан
«Объективта – әни»