Рөстәм Миңнеханов Питрәч районында күп функцияле үзәкне ачты

Питрәч муниципаль районы Иске Шигали авылында күп функцияле үзәк рәсми ачылды. Авыл халкының олысы-кечесенең шушы вакыйга уңаеннан шатлыгын уртаклашырга Татарстан Республикасы Президенты вазыйфаларын вакытлыча башкаручы Рөстәм Миңнеханов, ТР мәдәният министры Айрат Сибагатуллин, ТР яшьләр эшләре һәм спорт министры Владимир Леонов, Питрәч муниципаль районы башлыгы Эдуард Дияров килгән иде. Тантанада ТР Министрлар Кабинеты, Дәүләт Советы Аппараты вәкилләре катнашты. Мәртәбәле кунакларны җыр-биюләр белән район үзешчәннәре каршы алды.

Күп функцияле үзәк Шигали авыл җирлеге советыннан, мәдәният йортыннан, китапханәдән гыйбарәт. Урамда яшел чирәм түшәлгән спорт мәйданы ачылган. Нибары ярты ел эчендә сафка бастырылган үзәккә 17 млн сум акча сарыф ителгән. Эдуард Дияров питрәчлеләрне яңа үзәк ачылу белән тәбрикләде, яшьләрнең аңа ихтыяҗы зур булуын билгеләп үтте. «Соңгы 4 елда бу районда - 4 нче күп функцияле үзәк, соңгы 3 елда - 8 нче спорт мәйданы. Мондый шартлар булганда, яшьләр шәһәргә китмәячәк, ә, киресенчә, биредә төпләнеп калып, безгә программаларны тормышка ашырырга булышачак», - дигән ышанычын җиткерде район башлыгы.

«Бүген сезгә, күп функцияле үзәк ачылу уңаеннан, шатлыгыгызны уртаклашырга килдек. Спорт мәйданы, шушы үзәк сезнең авылны тагын да күркәмрәк итәчәк, - дип мөрәҗәгать итте Рөстәм Миңнеханов чарада катнашучыларга. - Авыл - теләсә нинди дәүләтнең нигезе», - дип, ул авыл инфраструктурасын үстерүгә йөз тоткан 30 лап программа гамәлгә ашырылуы турында билгеләп үтте. Аның әйтүенчә, республикада күп функцияле 185 үзәк бар. «Мондый биналарны төзү дәвам иттереләчәк. Без халык мәнфәгатьләрен кайгыртырга тиеш», - дип Рөстәм Миңнеханов спорт мәйданчыкларына да ихтыяҗ зур булуын искәртте. Аның сүзләренә караганда, быел Татарстанда мондый корылмаларның саны 500 гә якын булачак. Рөстәм Миңнеханов үзәккә кирәк-яраклар алу өчен 100 мең сумга сертификат бүләк итте.

Төзелеш өчен җавап биргән «Строитель плюс К» ҖЧҖ директоры Ленар Григорьев Иске Шигали күп функцияле үзәге мөдиренә символик ачкыч тапшырды. Аннан соң кунаклар үзәк эченә узды.

сылтама: http://president.tatarstan.ru/tat/news/view/126029

Следите за самым важным и интересным в Telegram-каналеТатмедиа