Казанда элемтәче-сугышчыга һәйкәл ачылды

Бөек Ватан сугышы елларында Татарстан элемтәчеләре дә пуля явы, танк һөҗүмнәре вакытында да боерыкларны намус белән башкарган. Ул вакытта алар иң гади тапшыргыч, радиоалгычлар кулланып та, Җиңү көнен якынайтуга әйтеп бетермәслек өлешләрен керткән. 9 май көнендәге «Җиңү, кадерле иптәшләр!» дигән сүзләрен нәкъ менә элемтәчеләр ярдәмендә ишетелгән.

Һәйкәлнең тантаналы ачылышында Бөек Ватан сугышы ветераннары, Татарстан Дәүләт Советы рәисе Фәрит Мөхәммәтшин, аның урынбасары Римма Ратникова, мәгълүматлаштыру һәм элемтә министры Роман Шәйхетдинов, «Татмедиа» Республика матбугат һәм массакүләм коммуникацияләр агентлыгы житәкчесе Айрат Зарипов, Казанның Совет районы администрациясе башлыгы Рөстәм Гаффаров, «Таттелеком» ААҖ генераль директоры Лотфулла Шәфигуллин катнашты. Кунаклар элемтә ветераны Константин Синицын белән берлектә һәйкәлне тантаналы рәвештә ачып, чәчәкләр салды.

– Хөрмәтле ветераннар, 1945 елдан башлап май көннәре һәрвакыт Җиңү көне белән бәйле иде. Фашизмны җиңеп, зур батырлык күрсәткәннәргә без 70 ел дәвамында дан җырлыйбыз. Республика җитәкчелеге исеменнән элемтәче-сугышчыларны котлыйм. Сугыш вакытында элемтәсез, фронттагы төрле хәрбиләрнең тырышлыгын координацияләүсез җиңүгә ирешеп булмас иде, – диде Фәрит Мөхәммәтшин.

Дәүләт Советы рәисе белдергәнчә, аның әтисе дә сугышта элемтәче буларак хезмәт иткән. 21 гасырда элемтә чыбыклы булмаса да, аның асылы шул ук кала бирә, элемтәдән башка үсеш юк, дип ассызыклады Фәрит Мөхәммәтшин.

Әлеге һәйкәлне ачу – “Таттелеком” компаниясенең элемтәче-сугышчыларына  истәлек һәм чиксез хөрмәт билгесе. Сугыш вакытында элемтәчеләр хәрби операцияләрне уңышлы үткәрергә булыша торган элемтә линияләрен булдырудан тыш, сугышчыларга туганнарыннан хатлар китергән. 300дән артык элемтәче Советлар Союзы Герое дәрәҗәсенә лаек булган. Оешма каршында ачылган һәйкәлдә – Советлар Союзы Герое, полковник-элемтәче Борис Кузнецов образы гәүдәләндерелгән. 2014 елның декабрендә аңа 90 яшь тулган. Бүген ул – Мәскәүдә, Җиңү Парадына әзерләнә. Чарага геройның туганнары килгән иде.

Чарага чакырылган ветераннар арасында беренче белорус фронты снайперы, элемтә ветераны Константин Синицын да бар иде. Ул фронтка, 10 сыйныфта укыганда эләгә, аннары Белоруссия, Польшаны уза, Берлин янында җәрәхәт ала. Шул сәбәпле, Җиңү көнен госпитальдә каршылый. Укчы отделениесе командиры исемен алуга ирешә. Сугыштан соңгы елларда Казан телеграфының Гражданнар Оборонасы һәм гадәттән тыш хәлләр штабын җитәкли.
 - Кадерле ветераннар, тыл хезмәтчәннәре, сугышны мин үз күзләрем белән күрдем. Чыннан да, сугышта катнашкан төрле профессия кешеләренә һәйкәлләр арасында элемтәчеләргә юк иде. Ниһаять, элемтәчеләр дә хәзер танкчы, артиллериячеләр белән бер рәттә. Безнең туган предприятиебезгә моның өчен зур рәхмәтлемен, – диде Константин Синицын чыгышында.

Лотфулла Шәфигуллин әйтүенчә, бу һәйкәлне булдыру - «Таттелеком» хезмәткәрләре идеясе. Оешма җитәкчесе ветераннарга ныклы сәламәтлек, тагын озак еллар дәвамында шушы һәйкәл янында очрашып күрешергә насыйп булсын дигән теләктә калды.

Сылтама: http://intertat.ru/tt/society-tt/item/44188-kazanda-elemt%D3%99che-sugyishchyiga-%D2%BB%D3%99yk%D3%99l-achyildyi.html