Хатын-кыз депутатларның “Мәрхәмәт-Милосердие” берләшмәсе быел Татарстанның Әтиләр советы һәм социаль учреждениеләрдәге Попечительләр советлары эшчәнлегенә яңа сулыш өрәчәк.
ТР Дәүләт Советы рәисе урынбасары, “Мәрхәмәт-Милосердие” берләшмәсе җитәкчесе Татьяна Ларионова сүзләренчә, Татарстанда 2009 елда оештырылган Әтиләр советы нигездә Чаллы һәм Түбән Кама шәһәрләре җирлегендә генә эшли. Бүгенге көндә Советны Чаллыда яшәүче күпбалалы гаилә башлыгы, 2014 елда “Ел әтисе” Бөтенроссия премиясенә лаек булган Юрий Соленов җитәкли. “Кызганычка, статистика соңгы елларда корылган гаиләләрнең 40 проценты таркалып баруын күрсәтә. Гаилә кыйммәтләрен саклау, балаларга тәрбия бирүдә әтиләрнең роле зур. Көнүзәк социаль мәсьәләләрне чишкәндә “Мәрхәмәт-Милосердие” берләшмәсе дә әтиләр көченә таянырга тели. Без бу хакта Татарстан Президентына мөрәҗәгать иттек, аңарда да хуплау таптык. Март аенда республика күләмендә әтиләр конференциясе уздырылачак. Тиздән Әтиләр советы бөтен район һәм шәһәрләрне колачлап тулы көченә эшли башлар дип өметләнәбез”, – дип хәбәр итте Татьяна Ларионова журналистларга.
Шулай ук быел “Мәрхәмәт-Милосердие” депутат хатын-кызлары социаль учреждениеләрдәге Попечительләр һәм Күзәтчелек советлары эшчәнлеген дә яңа дәрәҗәгә күтәрергә ниятли. “Без картлар йортларындагы Попечительләр советларыннан башларга булдык. “Мәрхәмәт-Милосердие” берләшмәсе вәкилләре инде дүрт картлар йортындагы вәзгыятьне тикшерде, 17 картлар йортының барысын да йөреп чыгачакбыз. Әйтергә кирәк, бүген 150 Бөек Ватан сугышы ветераны картлар йортында яши. Попечительләр советын бездә финанс ярдәмен күрсәтүчеләр итеп кабул итәргә күнегелгән, бу алай түгел, Советларның эшчәнлеген төрләндерү бурычы тора. Муниципаль берәмлекләр белән аңлашу бар, бергәләп без картлар йортларында яшәү шартларын яхшыртуга ирешергә тиеш”, – ди Татьяна Ларионова.
Мәгълүм булганча, республика парламентындагы берләшмәгә унбиш депутат хатын-кыз керә. 2015 ел азагыннан Татарстан муниципаль шәһәр һәм районнарында да җирле депутат хатын-кызларның “Мәрхәмәт-Милосердие” берләшмәләре төзелде. 2016 елда башкарылачак уртак эш планы белән таныштырып, Татьяна Ларионова быел да “Мәрхәмәт-Милосердие” ятим балаларның торак-коммуналь хуҗалык өчен бурычларын бетерү һәм ятим балаларны торак белән тәэмин итү кебек аеруча авыр мәсьәләләрне күз уңында тотачагын ассызыклады. “Узган ел без торак-коммуналь хезмәтләр өчен бурычларны 16 миллион сумга киметә алдык. 22 районда бурычлар калмады, 12 районда чираттагы түләүләрне генә хәл итәргә кирәк. Вәзгыять Казан һәм Яшел Үзәндә катлаулы, республика буенча 52 миллион сум бурычның 30 миллионы – Казанга карый. Казан белән Яшел Үзән буенча аерым чаралар күрергә туры киләчәк. Иң мөһиме – бүген безнең ятим һәм караучысыз калган балаларның һәркайсы турында мәгълүматлар тупланды”, – ди “Мәрхәмәт-Милосердие” берләшмәсе рәисе.
“Мәрхәмәт-Милосердие” 2016 елда бөтен министрлыклар, гаилә һәм балаларның иминлеген тәэмин итүче дәүләт органнары белән хезмәттәшлекне ныгытырга, халыкның социаль хәлен яхшырту өчен район һәм шәһәрләрнең сессияләрендә актив катнашырга һәм, катлаулы икътисади чорга карамастан, республикада хәйриячелек эшчәнлеген җәелдерүгә игътибарны арттырырга планлаштыра.
сылтама: http://intertat.ru
Следите за самым важным и интересным в Telegram-каналеТатмедиа
Комментарий юк