«Большая книга» – Казанда

«Большая книга – провинцияләрдә очрашулар» проекты Казанга килеп җитте. Аны матбугат һәм массакүләм коммуникацияләр чараларының Федераль агетлыгы һәм «Пушкин китапханәсе» фонды оештыра. 2008 елдан – проект эшли башлаганнан бирле «Большая книга» әдәби премиясенең финалистлары һәм язучы-лауреатлар инде Россиянең 27 төбәгендә булырга өлгергәннәр. Очрашуларның төп максаты – язучыларның һәм әдәби әсәрләрнең дәрәҗәсен күтәрү, бүгенге язучыларның әсәрләренә җәмгыятьнең игътибарын юнәлтү, талантларга терәк булу.

Татарстан кабул иткән кунаклар арасында «Большая книга» бәйгесенең финалистлары – «кыска исемлек»кә эләгүче язучылар Алексей Варламов («Алексей Толстой» биографиясе, 2007; «Мысленный волк» романы, 2015), Майя Кучерская («Тетя Мотя» романы) һәм Гүзәл Яхина («Зулейха открывает глаза» романы) бар. Очрашулар, китапларны тәкъдим итүләр 11-13 ноябрь көннәрендә Казанда, Яшел Үзән шәһәрендә, Лаеш һәм Байлар Сабасы районнарында узачак.

Әле беренче романы гына дөнья күргән Гүзәл Яхинаның шушындый дәрәҗәле кунаклар арасында булуы, Россиянең иң зур әдәби премиясенә дәгъва кылуы безнең өчен бигрәк тә сөенечле. Гүзәл – Казан кызы, ул монда туып-үскән. Аны татар укучысы белән иң беренче булып «Сөембикә» журналы таныштырды. Романыннан өзекләрне дә татарчага тәрҗемә итеп укучыга тәкъдим итүчеләр без булдык. Сүз уңаеннан: бу килүендә Гүзәл Татарстан китап нәшрияте белән романын татарчага тәрҗемә итү турында килешү дә төзеп китәчәк. Ә иртәгә аны Саба халкы белән очрашу көтә. Аның нәсел тамырлары да Саба белән бәйле.

Гүзәл Яхина турында «Сөембикә» журналында дөнья күргән язма һәм аның «Зөләйха күзләрен ача» романыннан өзекләр белән түбәндәге сылтама буенча таныша аласыз: http://syuyumbike.ru/medeniyat/proza/?id=1007

Следите за самым важным и интересным в Telegram-каналеТатмедиа