Арчада «Сөембикә»не яраталар

Районның татар теле һәм әдәбияты укытучылары һәм китапханәчеләрен исә кызыклы очрашу көтә иде. Кунаклар арасында Китап нәшриятының дәреслекләр, фәнни-методик идарәсе җитәкчесе Чулпан Ялалова, матур әдәбият бүлеге мөдире, язучы һәм шагыйрә Фирүзә Җамалетдинова, дәреслекләр авторлары, филология фәннәре докторы, профессор Чулпан Харисова һәм педагогика фәннәре кандидаты Рәдинә Ягафарова, «Сөембикә» журналының әдәбият бүлеге мөхәррире Эльмира Закировалар бар иде. Хатын-кыз, мәктәп, балалар, дәреслекләр, китап уку... Әнә шундый темаларны колачлаган кызыклы һәм файдалы сөйләшү булды ул. Кыска хикәяне язу җиңелме, әллә күләмле әсәрләрнеме? Язучы өчен кайсы геройлары якынрак? Әдәби әсәр ничек туа? Әлеге сорауларга Фирүзә Җамалетдинова рәхәтләнеп җавап бирде. Ә мәктәп балалары өчен дәреслекләр төзегән галимәләр туган телебезне укыту юнәлешендәге фәнни эшләре, проблемалар, алдынгы тәҗрибә турында сөйләде. Залда утыручылар өчен «Сөембикә» журналы аеруча якын һәм үз икән. Чөнки зур күпчелек – укытучы хатын-кызлар, китапханәче хатын-кызлар иде. «Көнүзәк мәсьәләләр дә, гыйбрәтле язмышлар да, актуаль темалар да – берсе дә битараф калдырмый безне. Хикәя-шигырьләрне, яраткан җырларыбызны, аш-су әзерләргә өйрәткән киңәшләрегезне көтеп алабыз», – диделәр. «Сөембикә»не өстәл китабы урынына файдалана икән Арча хатын-кызлары. Афәрин!