Яратканнар белән аерылмыйлар

Без ирем белән классташлар. Икебез дә бер шәһәрдә үсеп, күршеләр генә булып яшәдек. Бер гаилә булып яшәрбез дигән уй башка да килмәде ул чакларда. Гадәти дуслар идек, бары шул гына. Мәктәпне тәмамлагач, кайсыбыз кая таралышты. Минем әллә кая читкә китәсем килмәде, үзебезнең шәһәрдә генә медицина көллияте бар, укырга шунда кердем. Әнием дә шәфкать туташы булганга, бик тә якын иде бу өлкә. Якыннарым янәшәмдә, дусларым – кечкенәдән уйнап үскән кешеләр, көн дә үз өемә кайтам – минем өчен менә шул тулы бәхет иде.

Ә безнең классташлар арасында Мәскәүгә, хәтта Питерга китүчеләр дә булды. Тимур (иремнең исеме шулай) да үзебезнең Татарстанда гына калмыйча, Түбән Новгородка ук китте. Имештер, анда укырга керү җиңелрәк икән. Төзүче булырга тели иде ул.

Мәктәпне тәмамлавыбызга ни арада ун ел узган да киткән. Мин инде үзебезнең поликлиникада эшләп, шактый гына тәҗрибә туплаган шәфкать туташы идем. Тимур да укып бетереп, берара кайсыдыр шәһәрләрдә эшләп йөрде дә, кайтып, үзебезнең заводка эшкә урнашты. Үткәндә-сүткәндә очрашкалый, бер-ике авыз гына сүз алышкалый идек үзе белән.

Классташлар белән очрашу уздырырга кирәклеге кемнең идеясе булгандыр, бер-беребезнең телефоннарын табышып, очрашырга сүз куештык. Тимур белән без шул көннән соң якынаеп киттек. Очрашу кичәсе төнлә генә бетте, мин аның машинасына утырып кайттым. Аннары да тиз генә аерыла алмыйча, тегесен-монысын сөйләшеп утырдык әле. Икенче көнне эштән кайтышыма Тимур мине подъезд төбендә көтеп тора иде, икәүләп шәһәр үзәгендәге яңа ачылган паркны карарга киттек. Икебезнең дә йөрәгенә әкренләп кенә мәхәббәт үтеп керде. Озак йөрмәдек тә, Тимур өйләнешергә тәкъдим ясады.

Бөтен җир йөзендә бездән дә бәхетлерәк кеше булмагандыр. Икебезнең дә эшебез, торыр урыныбыз бар, әти-әниләребез исән. Әбиемнең ике бүлмәле фатиры калган иде, Тимур – төзүче кеше, шунда бик матур итеп ремонт ясап кердек. Яңа җиһазлар, яңа савыт-сабалар алып, ремонттан соң өр-яңа булган ямьле фатирыбызда бик матур итеп яшәп киттек. Ял көннәрендә табигатькә чыгабыз, әти-әниләребезгә булышабыз, бөтен эшләрне бергәләп эшлибез...

Бер елдан кызыбыз Зәйнәп туды. Бәхетебез түм-түгәрәк, тормышыбыз тигез, җитеш: «И Раббым, берүк күпсенә генә күрмә инде», – дип дога кыла идем төннәрен.

Зәйнәпкә бер яшь тә тулмаган иде әле, Тимур Мәскәүгә барып карарга теләвен әйтте. Янәсе, хәзер бу иң җайлы вакыт: мин бала белән өйдә утырам, булышырга әти-әниләр дә якында гына. Барып урнашып, бераз акча эшләүгә, безне дә кайтып аласы икән. Аның бу нияте белән күңелем бер дә килешмәсә дә, юлына аркылы төшәсем килмәде. Мәскәү ул кунакка барып кайту өчен генә күңелле җир булып тоела миңа. Андагы шау-шу, кыйммәтчелек, ыгы-зыгы, тиз ритм хәзер ялыктыра. Үз шәһәребезнең тыныч тормышына, саф һавасына, күз күреп белгән кешеләренә, яшеллегенә ни җитә соң! Эшкә дә җәяү генә барып кайта торган, балалар бакчасы да якында гына, мәктәбе дә... Хәтта Казан, Чаллы белән чагыштырганда бездәге кибетләрдә әйберләр дә арзанрак шикелле.

Иремнең шушы рәхәт тормыштан туеп, билгесезлеккә ыргылуы бик аптыратты. «Барсын, бетен басып кайтсын. Кайгырма, сагынуыннан бик тиз кайтып җитәр», – диде кайнанам. Эшеннән расчет алып, Тимур Мәскәүгә китте. Аның Мәскәү урамнарында төшкән фотолары белән телефонымның фотогалереясы тулды. Бик бәхетле кеше елмая иде аларда. Әнә ул институтта бергә укыган курсташлары белән очрашкан, әнә ул «Кызыл мәйдан»да йөри, әнә ул «Воробьиные горы»да...

Көннәр үтте. Тимур юньле-рәтле эш таба алмады. «Монда бөтен нәрсә шундый кыйммәт, акча су кебек ага гына», – дип язды ул. Мин аның шулай буласын алдан ук белгән идем. Бала белән өйдә генә утыргач, минем дә акча ягы бик такыр. Әле ярый әни бар, ул минем хәлне аңлап, ярты пенсиясе белән булышып тора, балага тәм-томын, җиләк-җимешен ала... Әнинең пенсиясенә яшәвемә шулкадәр дә кыенсынам. Боларны Тимур да белде, билгеле. Баштарак ул мине юата иде. Әмма аның: «Түз инде, тиздән бар да җайланачак», – дигәнен тора-бара: «Җитте инде сиңа ыңгырашырга!» – дигән тупас җөмләләр алыштырды.

Тимур безнең янга бары ярты елдан соң гына кайта алды. Аңынчы тегендә-монда урнашып карады. Кайдадыр аз түләделәр, кайдадыр бөтенләй түләми генә чыгарып җибәрделәр. Эшләгәненең күбесе фатир арендалауга, юлга һәм ашауга китте. Бер фатирда алты кеше яши, юлга ике сәгать вакыты һәм дөнья кадәр акчасы китә, аның каравы «никадәр драйв имеш». Ул бу хакта сөйләгәндә минем кычкырып-кычкырып елыйсым, бәхетле тормышыбызны, балабызның иң матур вакытларын син шушыңа алыштырырга ризамы дип, йөзенә бәреп сорыйсым килде. Тик түздем, үземне, болар бар да вакытлыча, бер кайтса, инде башка китмәс дип юаттым. Кайтканда ул кызыбызга үзеннән ике тапкырга зуррак курчак һәм бер размерга кечкенә ботинкалар алган иде. Моны иремнең безнең тормыштан читләшә башлавы дип кабул иттем. Ник бер кирәксез әйберләргә акча әрәм иткән инде? Балага кирәклерәген алган булыр идек бит. Тик ул инде безгә нәрсә кирәге турында уйлап азапланмаган.

Бер атнага дип кайткан кеше өч көннән тагын юлга җыенды. «Иптәшләр шалтыратты, яхшы эш чыгарга тора. Мәскәү сине көтеп ятмый», – дип аңлатты ул моны. Тагын ярты гына ел түзүемне сорады, аннары бар да яхшы булыр дип ышандырды: «Ипотекага бер бүлмәле булса да фатир алырбыз, син дә эшкә урнашырсын, Зәйнәпне бакчага бирербез....» Күңелем боларның берсенә дә ышанмады. Түм-түгәрәк тормышыбызның кителә башлавын җаным-тәнем белән тойдым.

Ул китте. Соңгы бер ел эчендә ул өйдә нибары өч тапкыр булды. Барысын бергә җыйсаң, ун көнгә дә тулмыйдыр. Ул вәгъдә иткән муллыкның «м» хәрефе дә күренмәде. Мәскәүдәге хезмәт хакы үзебезнең заводта алганыннан әллә ни артык түгел иде. Әмма фатирга, юлга, ашау-эчүгә түли башлагач, безгә бирерлек берни дә калмый иде аннан. Баланы әнигә калдырып (бакча чираты өч яшьтән соң гына җитә), үзем эшкә чыктым. Шәфкать туташларының хезмәт хакы зур түгел, кичләрен кешеләргә укол кадап, система салып та акча эшләштергәлим. Тимур булышмагач, бер үземә генә тормышны сөйрәве бик кыен.

Күпләр минем үземне гаепли: ник иреңне җибәрдең, диләр. Үзең аның артыннан бар дип киңәш бирүчеләр дә юк түгел. Мин үзем дә кайчак шулай уйлыйм. Ләкин Тимурның безне Мәскәүгә алдырырлык җае юк. Ә минем болай да әтиле килеш әтисез үсүче баламны инде әнисез дә калдырып, ялгызым гына аның янына чыгып китәсем килми. Яшь бала багуы әниемә дә кыен булачагын беләм, инде болай да безгә бик зур ярдәм итә.

Бер нәрсә генә җанымны телә: гаиләбезнең бәхетен, кызы белән мине ул ничек шушы билгесезлеккә алыштыра алды икән? «Яратканнарыгыз белән аерылмагыз», – диләр бит. Шулай ачлы-туклы кеше почмакларында бездән башка яшәргә риза булгач, без аның яратканнары булып чыкмыйбыздыр инде, күрәсең.

 

 

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (3)
Cимвол калды:
  • 11 февраль 2021 - 13:05
    Без имени
    Әйе, шулай булып чыга.
  • 3 май 2020 - 10:32
    Без имени
    Монын канында зимагурлык бит. Бер койдэ генэ яши торган кеше тугел бу.
  • 3 май 2020 - 10:13
    Без имени
    Ботенесе ир-аттан тора.Гаилэсен таркатмыйча гына уз шэхэрендэ яшэсэ ни булган.Уземнен башымнан утте барда.Ирем була торып ирлэр эшендэ,хатын-кыз эшендэ узем башлап эшлэдем.Алла ярдэм бирсен барыбызгада.
Хәзер укыйлар
  • Киткәннәрне нигә туктатырга? Гөлнара, матур төшләр күреп, татлы йокыга талган иде... Менә ул Камышлыкүл болынында яланаяк йөгереп йөри. Бу аның кыз чагы икән бит.
    6559
    0
    96
  • "Син безгә кыз килеш килмәдең..." Минем икенче балам ашыгыбрак – алты ай ярымнан ук туды. Нигә болай иртәләгәндер, андый сәбәп тә юк к
    9180
    0
    73
  • 4305
    0
    49
  • Бүләк Уфада яшәп иҗат итүче язучы Дилә Булгакова хикәяләрендә нечкә хис, драматик лиризм өстенлек итә, геройның иң тирән күңел кичерешләре ачыла. Укучылар аның шигырьләрен, нәсерләрен, балалар өчен язылган әкиятләрен дә яратып кабул итә. Ә аның шигырьләренә язылган «Кыр казлары», «Сагынам», «Үпкәләмә» кебек җырлары халык арасында бик популяр.
    3431
    3
    37
Реклама
Соңгы комментарийлар
  • 15 апрель 2021 - 10:33
    Без имени
    Йомшак күңелле балалар үзләре башлап сөйләшергә дә белмиләр шул. Минем дә бердәнбер улымның йөрегән кызлары үзеннән олы була. Ахрысы, кызлар үзләре кыюрак минем улымнан. Берни дә әйтеп булмый. Үзе тормышын үзе корсын, дип, барысына да риза мин.
    Улыбыз өч балалы хатын алган...
  • 15 апрель 2021 - 08:49
    Без имени
    Мескен апа, жылап укыдым. Рэхмэт Фагилэ
    Сания апа бәхете
  • 15 апрель 2021 - 09:13
    Без имени
    Тиле Бергена торле булмый шул! Анны биргэн акчаларын нык жыеп тоталар иде..узендэ берэр торып урын кара Иден бу кон килэчэге кон кебек ачык иде лэбаса!
    Бумеранг законы 
  • 15 апрель 2021 - 06:36
    Без имени
    Кайчандр улда бит хатыныкы г-на булган син аны аертп алдын.алай бэхетле булп буламы. Тап башканы буйдак аерылганны. Хэм яшэ гаилэ короп балан булгач бэлхем иялэшерсен. Купме хатын ялгыз тормош алып бара. Авыр булсада. Баласы дип Яши. Парлы матур гаилэне бозоп аерп яшэмэгез. Гел тормош ак полосадангна тормый. Ометлэнеп яхшы хыяллар, эчкерсезлек уцсезлек б, н яшэргэ кирэк. Кешегэ хэттэ дошманынада яхшы телэк телэсэ, узендэ унай ягы б, н кайтр.
    Бумеранг законы 
  • 15 апрель 2021 - 06:49
    Без имени
    Гомер буе матур тороп булмый, аннан баланы сонга калп тапсан, устеруе читен. 35 тэ2 табалар.ул барбр хатынын ташламый, тормош алып баррга ул яхшы, балалары очендэ яхшы эни. Атнага 1 Ир курэм дип ят инде. Ялгзак булып. Анлаш. Анын б, н. Яшьлек утэ сизмисен олгайганны. Хатыны белсэдэ дэшми. Топле. Ул бары синен назын рэхэтлеген алыр оченгнэ килэ бит. Утрып чэйдэ эчмэгэч. Бу ярату тугел. Э син куркасын авырлыктан тормош алып бара алмам башка б, н дип. Акча эз булсада житэ. Куп булсада бетэ. Парлы булып анлашп яшэгэндэ житэ.
    Cөяркәм фатир бүләк итте
Реклама
Әлфия Миңнуллина: «Әни Казанга яланаяклы кыз булып килгән иде, яланаяк мәңгелеккә китеп бара...»
Фарфор буенча рәссам Римма Газалиеваның шәхси күргәзмәсе
Укучыга таба яңа адым: «Сөембикә»нең февраль санын тәкъдим иттек 
Венера Ганиеваның ире, тавыш режиссеры Камил Фәйзрахмановны соңгы юлга озату
Беренче дулкын. Өмет, курку, хисләр
Татарстан журналистикасы тарихы – фотоларда
Бу – безнең уртак тарихыбыз
Журналыбыз архивыннан
«Объективта – әни»
Кешелек хакында фәлсәфи уйланулар, робот София һәм ипи