Мәскәүне төяп кайттым

Ура! Мин Мәскәүгә китәм! Бер айга! Баш редактор журналистлар курсларына укырга җибәрә! Бу әле минем балалар журналында эшләгән еллар, җай чыгу белән «Татарстан» поездына утырып Мәскәүгә кием-салым, косметика алырга йөргән чаклар.

Әллә кая җир читенә киткәндәй, шул сәфәргә җыена башладым. Сумкага журналларыбызны тутырам (күрсеннәр нинди матур журналлар чыгарганыбызны!) «Пионерская правда» өчен язылган мәкаләмнең рус теленә тәрҗемәсен сумкага шудырам (берничә язманы да алып килергә кирәк, диделәр). Күчтәнәчкә чәкчәк (белмим, кемгә бирермен. Һәрхәлдә, Казаннан Мәскәүгә баручылар күчтәнәчкә чәкчәк тыкмый калмый!) Туфли, берничә күлмәк, джинсы, футболкалар... Һәм, әлбәттә, заказлар тулы блокнот. Әйе, әйе! Эштәгеләр Мәскәүгә китүемә үземнән дә ныграк сөенде бугай. Күлмәкләр, босоножкалар, кроссовкалар, ботинкалар, курткалар алып кайтырга кушып, чират торып блокнотка үз размерларын әйтеп яздыра башладылар.

Фәйрүзәгә кофта кирәк икән. 44 нче размер таман гына булачак, ди. Фотограф Рөстәм өзми-куймый фотостудия, цифрлы фотоаппарат турында сөйләп тора. Ә урамда – ХХ гасыр гына әле: пленкалар заманы. Кибетләрдән таба торган түгел. Слайдлар төшерә торган кодак пленкалары аз-маз эләккәли шунда. Рөстәм хыялындагы чит ил фотоаппаратларын да спекулянтлар, фарсовщиклардан гына табып була. Котым очып: «Мин фотоаппарат ала белмим», – дигәч, кычкырып көлеп җибәрә дә: «Юк, мин аны кушмыйм. Эктахром пленкалары гына алып кайтырсың», – ди. Каядыр «Маяковская» метро станциясе ягында «Фототовары» магазины бар ди, мин шуннан эзләргә тиеш булам икән. Әлфия 6 яшьлек улы өчен бер-ике малайлар күлмәге, уенчыклары өчен батарейкалар, «Кубик Рубика»ны куша. «Детский мир»дан алырмын. Улыма да машина йөртергә өйрәтә торган, бөтен малайларның күзен кыздырган «За рулем» өстәл уенын алып кайтам дип ышандырдым бит. Сеңлем шалтырата: «Эче мехлы, тышы плащ кебек пальто алып кайт әле, миңа таманы «Детский мир»да була икән», – ди. Иремә – кышкы ботинкалар, аның студент сеңелләренә ялтыравыклы польский босоножкалар кирәк булып чыкты. Тагын... Мәскәүгә баручыларга «Бодрость» чәе, «Москвичка» карамельләре, кофе, апельсиннар алырга кушалар. Тагын помада, тушь, «Быть может» духилары... «Ярар, ярар! Алам, алам!» – дим. Үзем вокзалга ашыгам...

...Метродан «Комсомольская»дан «Ждановская» (хәзер «Выхино») станциясенә кадәр барасы да, 197 нче автобус Юность урамындагы ВКШ дип аталган югары комсомол мәктәбенә китерә дә җиткерә. Журналистлар укуына СССРның бөтен республикаларыннан килгәннәр! Мин латыш кызлары белән бер бүлмәдә. Менә бәхет! Күршедәге тулай торакта үзебезнең Фирая да бар бит әле! (Бер елга укырга килгән журналист Фирая Бәдретдинова «Пионерская правда»да стажировка уза.) Атаклы журналистлар, сәясәтчеләр безгә лекцияләр укый. Кайбер көннәребез редакцияләрдә уза. Дәресләр тәмамлануга, көн саен метрода «Кузнецкий мост»ка кадәр барып, «ЦУМ», «ГУМ», «Детский мир»ларны айкыйм. Сеңлем кушкан теге пальтога «Детский мир»дагы чиратны күрсәге-е-ез! Икенче каттан өченче каткача! Учка чират номерын язалар!

Мин 93 нче! Киеп карап, тәки алдым! Ә Фәйрүзәгә яраклы кофтаны «Лейпциг» магазиныннан таптым. Зәп-зәңгәр, бик матур! Ошатачак! Бер көнне – «Будапешт»та, икенче көнне «Белград»та, өченче көнне – «Ванда»да... Арып-талып, әмма бик канәгать кыяфәттә бүлмәгә кайтып керәм дә кемгә нәрсә алуымны сөйли башлыйм. Кызлар көлә: «Ә кайчан үзеңә аласың?» – диләр. Белмим, нигәдер Мәскәүдә тизрәк уйлый, җәһәтрәк кыймылдый башлыйсың.

Анда тизлек, темплар башкача. Фирая инде «москвичка»га әйләнгән: әле Демис Руссос концертына, әле Лужникига фигуралы шуу турнирына алып китә. Ваганьково, Новодевичьеларга барып чыгабыз. Минем дилбегә буе заказларны бергәләп тә үтибез. 

...Кайтып китәр көн дә җитте. Тик... бу кадәр әйберне ничекләр күтәрермен?! Зур юл сумкасы, ике пакет шыплап тулды. Ә сыймый калган кроссовкалар, китаплар, «За рулем» почмакта кечкенә бер өем ясап, нәүмизләнеп тора һаман. Мине озатырга җыенган Фирая да шаккатты. Төргәкләрне җайлап, үзенчә тутырып карый – сыеп бетми. Ул мине «Вешняки» универмагына тагын бер зур сумка алырга йөгертә. Тизрәк, тизрәк! Поездга да өлгерәсе бар! Ниһаять!.. Икебезнең дә кулларда икешәр пакет, зур сумкалар. Казан вокзалына метрода башта «Таганская»га кадәр барасы, аннары «Кольцевая»га күчәсе, болгавыр «Комсомольская»да төшәсе... Уф!.. Вокзалга электричкада китәбез. Вагонга кереп утыргач инде җиңел сулап куям. Бөтен Мәскәүне төяп кайткач соң ни...