Июнь аеннан башлап кара көзгәчә уңыш бирә ала торган ремонтант сортлы бакча җиләкләрен хәзер күпләр үстерә. Ләкин көзгә кадәр уңыш бирсен өчен, бу җиләкләрне бик белеп, дөрес итеп тәрбияләргә кирәк, чөнки ул еш кына микро һәм макро-элементларга кытлык кичерә.
Вакытында тукландырып тормасаң, ремонтант сортлы бакча җиләге вагая, тәмсез була.
Уңыш биргән вакытта бакча җиләге калийга аеруча мохтаҗ була. Калий җиләкләрнең тыгызлыгын һәм баллы тәмен тәэмин итә.
Шул ук вакытта бер калий белән генә дә булмый: фосфор, кальций, магний, цинк, бор, тимер дә кирәк аларга.
Ремонтант җиләкнең тагын бер үзенчәлеге – сезон дәвамында ул азотка да мохтаҗ. Азот җитешмәсә, яфракларда хлороз башлана.
Һәр элементны аерым-аерым сипкәнче, комплекслы ашлама куллану күпкә отышлырак. Мондый ашламада барлык элементлар да тиешле күләмдә генә була. Шулай да җиләккә төрле чорда төрле элементның мулрак кирәклеген дә истән чыгармыйк.
Чәчәк бөреләре формалашканда аңа азот күбрәк кирәк. Ә менә көзге чорда инде азот белән тукландыруны туктатсаң яхшы, чөнки җиләк куакларының кышка әзерләнәсе бар, азот моңа комачаулый.
Җиләкләр тулышып, кызара башлаган чорда калий белән ашласаң яхшы. Җиләк җирдәге калий запасларын бик нык суыра торган үсемлек.
Ә менә фосфорлы ашламаны аңа сезонга бер-ике тапкыр сибү җитә, җиләккә фосфор күп кирәкми.
Август ахыры, сентябрь башында ремонтант бакча җиләгенә менә бу ашламаларны сибәргә мөмкин: калий монофосфаты (10 литрга 12 г), калиймагнезий (10 литр суга 10 г), суперфосфат (10 литр суга 10 г), калий сульфаты (10 литрга 12 г). Әлеге ашламаларны табуы кыен түгел, алар бакчачылык кибетләрендә сатыла, суда яхшы эри. Үсемлекләр дә аларны тиз үзләштерә.
Бу сорауны күпләр бирә. Әгәр яфракларда чир билгеләре һәм корткычлар булмаса, аларны бөтенләй үк кисәргә кирәкми, бары сынган, корыган яфракларны гына өзү белән дә чикләнергә була. Гадәти бакча җиләгеннән аермалы буларак, ремонтант җиләкнең үсү бөреләре сезон дәвамында формалашып тора, ул көн озынлыгына бәйле түгел. Әгәр аны бөтенләй яфраксыз калдырсаң, ул бар көчен яңа яфраклар үстерү өчен тотачак. Ә бит бу җиләкнең берьюлы берничә бурычы: яңадан чәчәк тә атарга, яңа җиләкләр дә өлгертергә, шул ук вакытта яңа мыеклар да җибәрергә...
Чирле һәм сынган, корыган яфракларны кисеп алганнан соң, җиләкләргә бөрәр төрле биофунгицид бөркеп чыгарга кирәк булачак. Мәсәлән, Эффект Био, Баксис, Фитоспорин, Хорус, Топаз, Скор.
Ремонтант бакча җиләгенең тамырлары бик өстә генә урнашкан. Гадәти җиләккә караганда, алар кышын тизрәк өши. Шуңа күрә җиләк түтәлләрен кышка салам белән каплап калдырсаң, ышанычлырак.
Шулай ук җиләкләргә дым кирәген дә онытмагыз. Көз коры килсә, аларга атнага бер тапкыр мулдан су сибегез.
Менә шушы киңәшләрне тотсагыз, әле сентябрь ахырына кадәр бакчагыздан уч тутырып җиләк җыеп керерсез.
Следите за самым важным и интересным в Telegram-каналеТатмедиа
Комментарий юк