Балачак тәме

Айгөл, ни өчен нәкъ менә туңдырма ясый башладыгыз? 
– Бәләкәйдән спорт белән шөгыльләнгән кечкенә кызым туңдырма ярата иде. Тренировкадан кайткан саен, кибеттән туңдырма алабыз. Составларын укыгач, шикләнеп тә калам. Уйлана башладым: үз балаларым өчен дә, шул ук вакытта татарлыкка да бәйле булган нәрсәдер эшлисем килде. 2019 елда, әле пандемия башланган гына чорда, шушы эшемне башлап җибәрдем. Туңдырма сатуга керештем. Бу – бик яхшы сыйфатлы туңдырма. Мин аны бары тик натураль продуктлардан гына ясауның ысулын таптым. 

Бу эшегезгә кадәр нәрсәләр белән шөгыльләндегез?
– Мин тумышым белән Саба районы Шәмәрдән бистәсеннән. Мәктәпне тәмамлагач, берничә ел Төркиядә яшәдем. Әмма туган ягым гел үзенә тартып торды. Татарстанымны сагынып кайттым. Казаным бик кадерле миңа. 15 елдан артык дәүләт хезмәтендә – Казан шәһәр Думасында оештыру бүлеге җитәкчесе булып эшләдем. Хәзерге көндә Мамадыш муниципаль район Советы депутаты мин. Халыкның яшәү шартларын яхшыртуга зур игътибар бирәм. Омар авылының бер урамында халык озак еллар инде өйләренә су кертергә хыяллана иде. Минем хыялга да әйләнде ул. Хыялымны тәки чынга ашырдым бит: үз акчама 11 йортка су да керттердем, клубка ремонт та ясаттым. 
Ике кызым бар. Балаларым дип яшим. Әйткәнемчә, туңдырма ясый башлавыма да алар сәбәпче. Олы кызым – төп ярдәмчем. Оештыру эшләрен дә алып бара, график та төзи, сату белән дә ярдәм итә, хезмәт хакларын түләү, исәп-хисаплар – эшләре санап бетергесез. 

Әти-әниегез дәүләт эшеннән бизнеска күчүегезне ничек кабул итте?
– Минем ике канатым алар. Эшемне дә бернинди кредитлар алмыйча, әти-әнием булышлыгы белән башлап җибәрдем. Аллаһка шөкер, ышанычларын аклый алдым. Эшем алга бара, үсештә. Кечкенәдән аларның ярдәмен тоеп үстем. Бүгенге уңышларымда әти-әниемнең өлеше бәяләп бетергесез. 

Айгөл, сез мәтрүшкәле туңдырмаларыгыз белән бөтенесен җәлеп иттегез. Бу идея каян килде?
– Без, татарлар, мәтрүшкәле чәй яратабыз бит. Килешәсездер, ул тәм безне балачакка алып кайта. Минем әти-әнием Башкортстанның Илеш районыннан. Алар монда юллама белән эшкә җибәрелгәч төпләнеп калган. Минем балачагым исә әби-бабай янында Илештә узды. Андагы рәхәтлек! Бабай белән урманга печән чабарга йөрим, мәтрүшкә, җиләк җыям. Әби һәр иртә кәҗә сөте белән сыйлый. Менә шундый матур хатирәләр һәркайсыбызда бар бит! Шулай бер кич чәй эчеп утырганда, уйларым белән мәтрүшкәле, җиләкле җәйләремә кайттым. Мәтрүшкәле туңдырма ясау теләге менә шул чакта кабынды. Татар кешесе күңеленә хуш киләчәк, тәмле дә булачак, дим. Алар бит химия катнаштырып ясалган ризыклар түгел, ә натураль продуктлар. Безнең аяк астында гына үскән табигать байлыкларына яңа төсмер биреп, мәтрүшкә, җиләктән чәй һәм кайнатма гына түгел, туңдырма да ясый алдым. Сөт белән дә шулай ук. Бары тик үзебезнең натураль сөтне генә кулланам. Сыер сөтеннән кала, кәҗә һәм лактозасыз сөттән туңдырма ясыйм. Аллергия булган кешеләр өчен файдалы да, тәмле дә... Кабатлап әйтәм: безне әби-бабайлы чакка алып кайта торган тәм...

Алай да күңелдә халык ничек кабул итәр дигән икеләнү бар иде. Кабул да иттеләр, яраттылар да. Ялгышмаганмын. Һәр җитештерүченең – үз туңдырмасы. Минеке менә – үземчә! Сатып алучыга үзе яратканын сайлап алырга гына кала.

Татар акценты белән дә...
– Әйе, туңдырма ясый торган продуктлар – барысы да үзебезнеке. Әйтик, сөтне – Питрәч районыннан, майны – Арчадан, мәтрүшкәне – Тәтешледән Зөфәр абыйдан, җир җиләген Мамадыштан алам. Карлыган да, сырганак та Балык Бистәсеннән килә. Шулай ук фисташкалы һәм лимонлы туңдырмалар ясыйм. Менә ул продуктлар гына Татарстаннан түгел. Аңлагансыздыр: мин үзебезнең кече фермерлар белән эшлим. Аларга бик рәхмәтлемен: һәрвакыт сыйфатлы продукция гына алып киләләр. Иртүк китерәләр, мин шундук туңдырма әзерли башлыйм. Катыра-йомшарта торган әйберләр, буяулар кулланмыйм. Барысы да табигый. Фермер хуҗалыкларында җитештерелгән продуктлар – чиста, чын ризыклар. Алар геннарыбызга да туры килә. Шуларны ашарга кирәк. Төрле ГМОлы азыклар ашап йөрүчеләрне кызганам мин. Үзебездә җитештерелгән азык сәламәтлеккә дә файдалы, җанга да ятышлы. Хәләл сертификатым да бар. Аны миңа Камил хәзрәт Сәмигуллин шәхсән үзе тапшырды. Әйтик, ислам кануннары буенча, ризыкны идәнгә куярга ярамый. Тартмаларда, махсус савытлардамы ул, мөһим түгел. Шуңа күрә мин махсус поддоннар кулланам, продуктларны да шунда куям. 

Продуктларның сыйфаты ничек тә булса тикшереләме? Туңдырманы кайда җитештерәсез?
– «Казан» агросәнәгать паркында ясыйбыз да, сатабыз да. Безнең агропаркта бирегә кертелә торган продукцияне тикшерүче лаборатория бар. Заман таләпләренә туры килгән мондый лаборатория булу бик тә уңайлы, чөнки сыйфатсыз продукцияне үткәрмиләр. Уңай шартлар (продуктларны саклау, җитештерү, сату зоналары, мини-кафе бар) тудырылган урында эшләү – үзе бәхет. Хәзер азык промышленностенда иң куркынычы – төрле инновацияләр дип саныйм мин. Хәтта шундый туңдырмалар уйлап чыгарганнар: алардан тавык ите тәме, бәрәңге тәме килә. Аңлашыла инде, химия кулланылган продуктлар яки микроэлементлар бар анда. Ә мин җитештергән туңдырмаларда бөтенесе табигый! Бөтенесе табигать байлыгы! Моңа ирешүем белән чиксез горурланам!

Монда җитештерү зонасы ачык. Туңдырманы сатып алучыларның күз алдында ясыйм. Аларны шулай ук Казан Кремлендә һәм «Туган авылым» территориясендә сатабыз. Туристлар күп йөри торган урыннар. Башкалабыз кунакларын да үзебезнең туңдырмалар белән сыйлыйсыбыз килә.

Айгөл, сезнең брендның исеме дә шактый үзенчәлекле...
– Туңдырма ясый башлагач, татарча үзенчәлекле исем эзли башладым. Махсус оешмага исем табарга заказ да бирдем. Күптөрле вариантлар булды. Ниндидер соравыма берсе: «Әлбәттә, дөрес әйтәсез», – дип җавап бирде. «Әлбәттә» сүзен шундый матур итеп әйтте – шул исемгә тукталдым. Нинди матур, позитив, яхшы мәгънәле татарча сүз! Ул тормышыма да уңай йогынты ясады. Нәрсәдер сорасам, күпләр: «Әлбәттә», – дип, елмаеп җавап бирәләр.

Туңдырманы ашавы гына рәхәт кебек. Аны әзерләү авыр процессмы?
– Туңдырманың сөт, каймак, майдан торган базасын махсус аппаратта ясау өчен якынча 40 минут вакыт китә. Аннары берничә сәгать туңдырма «сулый». Башка аппаратта туңдырманың тәме әзерләнә. Базага ингредиентлар, әйтик, мәтрүшкәдән үзем әзерләгән сироп яки башка тәмләткеч кушыла. 8 минуттан туңдырма әзер була һәм шок белән катырыла торган туңдыргычка 2 сәгатькә озатыла. Аннары якынча 8–12 сәгатькә гадәти туңдыргычка куела. Әзер булгач инде –18 градуслы махсус складта саклана. Башка җиләк-җимешләр, шул исәптән, мәтрүшкә дә шунда ук катырып куела. Болай иткәндә, аның тәме яңа өзеп алган кебек саклана. Бер партиядә 60 килограмм туңдырма әзерләнә. 

Нинди җиһазлар кулланасыз?
– Санкцияләр вакытында Италиядә ясалган югары технологияле җиһазлар алдым, түләү белән кыенлыклар булса да, хәл иттем. Хәзер бик яхшы техникаларда эшлим. Җиһазларны бик озак өйрәндем, эзләдем, хәтта Төркиягә берничә тапкыр барырга, алар тәҗрибәсен өйрәнергә туры килде. Үзләре килеп, җиһазларны урнаштырып та киттеләр. 

Ә конкурентларыгыз бармы соң?
– Юк дип уйлыйм. Хәләл туңдырма күп түгел бит. Мин җитештергән продукция – уникаль, ассортимент та үзенчәлекле. Татар халкы өчен дә, башкалар өчен якын булган тәмнәр. Мәтрүшкәле туңдырмага авторлык хокукларым да бар. Аннары минем кебек җитештерүчеләргә ихтыяҗ зур. Безнең туңдырма зур гипермаркет туңдыргычларында сыйфатын, тәмен югалтып та ятмый инде. Мин әзерлим дә, шунда ук сатып алучыга бирәм. Бернинди тышкы шартлар да минем продукциягә начар йогынты ясамый. Нәтиҗәдә, натураль продуктлардан, шикәрсез ясалган файдалы ризык беркемне дә битараф калдырмый. 

Җитештерүне киләчәктә тагын да җәелдерәсегез килмиме? 
– Беренчел максат: продукциянең сыйфатын югалтмаска. Үсешнең башка юллары да күп бит. Төрле проектлар белән хезмәттәшлек итәргә була. Тәкъдимнәр килеп тора, алар барысы да кызыклы. Туңдырмаларым белән кызыксынган һәр кеше өчен мин ачык, чөнки үз продукциямнең сыйфаты өчен үзем җавап бирәм. Шулай ук заказ бирүчеләрнең тәкъдимен дә истә тотып эшлим. Киләчәктә туңдырма тәмнәрен арттыру турында хыялланам. Милли ризыклар әзерләүче кафе-рестораннар белән дә хезмәттәшлек итәргә әзермен. Республикабыз кунаклары да, нәни дусларыбыз да татар акцентлы туңдырманы авыз итсен. 

Бизнес ачарга теләп тә, кыюлыгы җитми торган укучыларыбызга нинди киңәшләр бирер идегез?
– Әгәр сезнең мондый теләгегез бар икән, башкалар сүзен тыңлап торырга кирәкми. Тотыгыз да эшләгез. Холкыгызга, хыялларыгызга, күңел халәтегезгә туры килгән юнәлешне сайлагыз. Тәүлегенә – 24 сәгать, атнасына 7 көн эшләгез!

Фотолар: Анна Арахамия һәм шәхси архивтан

Әлбәттә сайтында Айгөл тәкъдим иткән туңдырма ассортименты белән таныша аласыз. Заказ бирү дә мөмкинлеге бар.

РЕКЛАМА 

2VtzqxXsa5x ИП Нурисламова Айгуль Ришатовна ИНН 163500800562