Журналистларның «әти»сен искә алдылар...

Бу көннәрдә Флорид абыйга 80 яшь тулган булыр иде... Безнең өчен ул һаман яшь, һаман студентлар арасындадыр кебек. Флорид Имамәхмәт улы Әгъзамовны – журналисика факультеты деканын без Флорид абый дип йөртә идек. Якын итү, ярату, тирән хөрмәтебез ярылып ята иде шул «абый» сүзендә.

Казан федераль университетының Н. И. Лобачевский исемендәге фәнни китапханәсендәге конференц-залда Флорид Әгъзамовның тууына 80 ел тулуга багышланган халыкара фәнни-гамәли конференция оештырганнар. Сәламләү сүзе белән чыккан Казан федераль университеты проректоры Денис Нургалиев, әнә, Флорид абыйны якташым иде дип сөйли. (Флорид абый Башкортстанның Чакмагыш районы Бикмәт авылында туган. –Э. З.) Ул ярдәмчел, ипле-җайлы якташының татар журналистикасына нигез салуы турында кабат искәртә. Республикабызда журналистлар әзерли торган институтның директоры Щелкунов Михаил Дмитриевич үз чыгышында гуманлылыкның Россия җәмгыяте үсешендә мөһим фактор уйнавына тукталып, тагын Флорид Әхмәтович турында сөйли башлый... Елена Дорощук, Сөмбел Таишева, Роман Баканов... Һәркайсы олы остазны җылы итеп искә ала, аның журналистика теориясе өлкәсендәге фәнни-тикшеренү эшләренә югары бәя бирә. «Игътибар үзәгендә – Кеше!» Флорид Әгъзамовның бер китабы әнә шундый исемдә. Миңа калса, бу сүзләр аның тормыш шигаре дә булып киткән. Без, журналистлар, язмаларыбызда, мәкаләләребездә Кешене үзәккә куеп, Кешеләрне яратып язабыз икән, димәк, ул безгә Флорид абыйдан бирелгән!

Флорид абыйны студентларының «әтисе» дип йөрттеләр. Хәзер ул исем Флорид абыйның шәкерте, КФУдагы социаль-фәлсәфи фәннәр һәм гаммәви коммуникация институтының татар журналистикасы кафедрасы мөдире Васил Гарифуллинга күчте. Кешелеклелек, хәлгә керә белү, дустанә җылы мөнәсәбәт кебек сыйфатлар аңа һичшиксез Флорид абыйдан «йоккандыр».

Конференция алдыннан Флорид абыйга багышланган видеофильмны кат-кат әйләндерделәр. Флорид абыйның шәкертләре сөйләде. Фотолар, фотолар.... Һәркайсыннан якты, ягымлы, кешелекле, гади Флорид абый елмая. Сагыналар аны. Сагынабыз...