Татарстанда сәләтлеләрне барлыйлар

Билгеле булганча, республикада гомер итүче халыкның тормыш шартларын яхшырту - Татарстан Президенты вазифаларын вакытлыча башкаручы Рөстәм Миңнеханов стратегиясенең төп юнәлешләренең берсе булып тора. Мәгариф, сәламәтлек саклау тармакларын камилләштерү, «Уңай мохит» һәм башка мөһим программаларны тормышка ашыру - болар барысы да шушы максатны күздә тотып эшләнә. Сәләтле яшьләр белән эшләү, аларга ярдәм итү исә – аеруча әһәмиятле өлкәләрнең берсе булып тора. Әлеге максатны тормышка ашыруда җәйге лагерьлар аеруча зур роль уйный.

Төп бурыч – сәламәтлекне ныгыту гына түгел

Мәсәлән, быелгы җәйдә «Президент белән бергә» хәрәкәте активистлары һәм «Сәләт» берләшмәсе тарафыннан гына да 20 махсус профильле-сәламәтләндерү лагере оештырыла. Алар Татарстанның 12 районыннан тыш, Чуваш, Башкортстан һәм Марий-Эл республикаларында да уздырылачак. Аларның төп максаты – нәкъ менә Татарстан Президенты башлангычын хуплау, яшьләргә үз проектларын, идеяләрен тәкъдим итү өчен шартлар тудыру.

- Хәзерге вакытта республикада 1200 лагерь эшли. Аларда 200 меңнән артык бала ял итә. Татарстан Россиянең башка төбәкләре белән чагыштырганда зур үзенчәлеккә ия: бездә яшьләрнең җәйге ялы белән Яшьләр эшләре һәм спорт министрлыгы шөгыльләнә, ә башка төбәкләрдә бу эш хезмәт яки инде мәгариф министрлыкларына йөкләнгән. Әйтергә кирәк, бу – республика өчен зур плюс. Ник дигәндә, биредә балалар сәламәтлекләрен ныгытып кына калмый, ә аларга үз проектларын тормышка ашыру, республика җитәкчелеге вәкилләре белән турыдан-туры аралашу мөмкинлеге туа. Беренче чиратта, бу, әлбәттә, җаваплы идарәчелекнең иҗтимагый оешмалар белән тыгыз элемтәдә эшләве нәтиҗәсе, - дип сөйләде безгә Татарстан Яшьләр эшләре һәм спорт министрлыгының балалар һәм иҗтимагый оешмалар белән эшләү бүлеге җитәкчесе Владислав Усанов «Сәләт» лагерьлары һәм форумнарын оештыру мәсьәләләренә багышланган очрашуда.

«Сәләт»леләр Рөстәм Миңнехановны көтә

«Сәләт» берләшмәсе тарафыннан оештырылачак чаралар белән «Сәләт» Фонды башкарма директоры, «Президент белән бергә» иҗтимагый инициативалар үзәге рәисләренең берсе Тимур Сөләйманов таныштырды.

- «Болгар-Туган тел», «Агыйдел форумнары, «Иске Казан» фестивале үткәреләчәк. «Сәләт» халыкара белем бирү форумы аеруча зур әһәмияткә ия. Быел анда 6 меңнән артык сәләтле бала катнашыр, дип уйланыла. Билгеле булганча, 2012 елдан башлап, бу чарада Татарстан Президенты Рөстәм Миңнеханов та актив катнаша, - дип ассызыклады Тимур Сөләйманов.

Агымдагы ел шулай ук чыгарма булмаячак, дип белдерде Тимур Сөйләманов.

- Татарстан лидеры безнең алга бик зур бурычлар куя. Рөстәм Нургали улының сәләтле яшьләр белән эшкә ни дәрәҗәдә зур әһәмият бирүе һәркемгә мәгълүм. Төп максатыбыз – Татарстанда яшьләр өчен зур мөмкинлекләр ачу. Аларның биредә яшисе, иҗат итәсе килсен. «Сәләт» исә инде 20 елдан артык шушы максатны күздә тотып эшли, - диде Тимур Сөләйманов.

Шунысын да билгеләп үтәбез, агымдагы елда «Сәләт» халыкара форумы 7-12 июль көннәрендә уздырылачак. Быел әлеге чара узачак территория шактый зурайган. Беренче чиратта, бу - биредә өр-яңа лагерь калкып чыгу белән бәйле. «Фәнсар» лагере элеккеге «Дубок» лагерен үзгәртеп кору нәтиҗәсендә барлыкка килгән, ул академия лагере формасында эшләячәк. Әлеге ял йортын булдыру Татарстан Президенты вазифаларын вакытлыча башкаручы Рөстәм Миңнеханов ярдәме белән тормышка ашырылган. Аны ачу тантанасы 10 июль көнне уздырылыр, дип планлаштырыла.


Сылтама: http://intertat.ru/tt/society-tt/item/45843-tatarstanda-s%D3%99l%D3%99tlel%D3%99rne-barlyiylar.html