Рөстәм Миңнеханов аерылышуларга каршы чыга

Гөлсинә ханым һәм Рөстәм әфәнде Миңнехановларның кабул итү тантанасына барлыгы төрле милләт вәкилләреннән булган 50 ләп гаилә чакырылган. Мондый тәүге очрашу үткән елда уздырылган иде һәм традициягә нигез салды.

“Республикада иң үрнәк гаиләләрне хөрмәтләү буенча күркәм традиция туды, республиканың төп бәйрәме алдыннан без иң-иң мактаулы гаиләләрне чакырабыз. Шул рәвешле, без яшьләргә үрнәк күрсәтәбез, чөнки гаилә ул – дәүләтебез, республикабызның нигезе, традицияләребез һәм мәдәниятләребезне саклау асылы. Бүген без республикабыз күпконфессияле, күпмилләтле дип әйтә алабыз, тынычлыкта, татулыкта яшибез һәм ата-бабаларыбыз тудырган шартлар нәтиҗәсендә үсеш алабыз. Без иң яхшы традицияләрне яшь буынга тапшырырга тиешбез. Сез яшьләребезгә үрнәк булып торырлык гаиләләр”, - дип сәламләде Рөстәм Миңнеханов гаиләләрне.

Аның әйтүенчә, Татарстанның төп казанышы буларак 2011 нче елдан уңай демография күзәтелүен билгеләп узарга була. “Өчәр, дүртәр һәм аннан да күбрәк бала алып кайтучы гаиләләр бар, бу бик сөендерә, димәк, кешеләр иртәгәге көнгә ышана дигән сүз”, - дип саный Рөстәм Миңнеханов.

Татарстан лидеры бүгенге көндә, республикада халык уңайлы йортларда яшәсен өчен, күп кенә программалар тормышка ашырылуын, медицина үсеш алуын, балалар бакчалары, мәктәпләр төзелүен һәм төзекләндерелүен билгеләп узды. “Быел 75 яңа балалар бакчасы сафка кертелә - бу республика тарихында булмаган хәл. Ел саен без 150-160 шар мәктәп төзекләндерәбез. Мәктәпләрдә азмы-күпме тәртип урнашты дияргә була. Алга таба балалар бакчаларына тотынабыз”, - дип белдерде Р. Миңнеханов.

Татарстан лидеры сәламәтлек саклау тармагында җитди эш алып барылуын ассызыклады. “Казанда заманча перинаталь үзәк төзелеп килә, киләсе елда ул файдалануга тапшырылачак”, - диде ул.

Рөстәм Миңнеханов чыгышында аерылышу процессын катлауландыру инициативасы тууын әйтеп үтте. “Яшерен-батырын түгел, җәмгыятьтә аерылышуларга битараф мөнәсәбәт яшәп килә, шуңа күрә аерылышу системасын бераз катлаулындырырга телибез. Тормышта барысы да була – аңлашылмаучанлыклар, низаглар да, әмма юл куешып килешә белергә кирәк, шуңа күрә аерылышу процедурасы ЗАГС һәм судта да күпкә четерекле булырга тиеш, бу нисбәттән гамәлдәге системаны үзгәртү инициативасы белән чыгарга телибез. Безнең өчен гаиләләрнең нык булуы мөһим”, - дип ассызыклады Рөстәм Миңнеханов.

Чыгышының азагында ТР лидеры үзе һәм тормыш иптәше исеменнән һәр гаиләгә рәхмәт җиткереп, бәхет, иминлек теләде. “Алга таба да яшь буын өчен үрнәк булып калыгыз”, - диде ул.

Очрашу кысаларында, Россия Федерациясе Президенты Указы нигезендә, Баулыдан Вячеслав һәм Елизавета Маркеловларга “Ата-ана даны” орден медале тапшырылды. Алар биш ул тәрбияләп үстергән. Азнакай шәһәреннән 5 бала үстергән Ольга Хөснетдиновага, Аксубай районы Иске Ибрай авылыннан 6 бала анасы Миләүшә Соруровага, Кукмара районы Байлангар авылыннан 5 кыз үстергән Нурия Рәхимовага “Ана даны” медальләре тапшырылды.

Бүген тантанада катнашкан гаиләләр арасында Нури Гани улы һәм Рауза Котдус кызы Ганиевларны атап узарга була. Алар бергә 60 елдан артык гомер кичергән, гаилә башлыгы Бөек Ватан суышында катнашкан, ә Рауза ханым – Россия Федерациясенең атказанган, Татарстанның халык артисткасы.

Тантанага чакырылган иң яшь гаилә – Яр Чаллыдан Антон һәм Гөлнара Галкина-Сәмитова гаиләсе. Антон 2004 нче елда Афинада Олимпия уеннарында катнашкан, 13 тапкыр Россия чемпионы исемен яулаган, хәләл җефете – 3 мең км га каршылыклар аша йөгерүдә XXIX Олимпия уеннары чемпионкасы, анда ул яңа дөнья рекорды куйган (8 минут 58,81 секунд).

сылтама: http://tat.tatar-inform.ru/news/2015/08/26/112847/