Республика көнендә кайда күңел ачарга?

Игенчеләр сарае каршындагы мәйданда XV Халыкара «Казан көзе» опера фестиваленең Гала-концерты уза. Анда дөнья сәхнәләрендә танылган татар кызы Альбина Шаһиморатова да катнашачак. Кичке сигездә башлана. Керү ирекле. 0+

Казан кремлендә  Noqta, «Ыспай Бит», Айрат Хәйруллин, АлияНур, Zarina, Ilgiz, Malsi Music катнашында «Дәрт Фест» заманча татар мәдәнияте фестивален тамаша кылырга була. Башлана көндезге бердә. Керү ирекле. 0+

Бәйрәмнең төп музыкаль вакыйгасы көндезге дүрттә «Казан» гаилә үзәге янында узачак. Биредә Алсу һәм Азат Фазлыевлар, Айла, «Пару ночей» төркеме, Дмитрий Железновның капелласы, Казан шәһәр филармониясе артистларының чыгышларын тыңларга мөмкин. Ә кичәнең төп артистлары – «Хор Турецкого» һәм Татьяна Буланова. Керү ирекле. 0+

Ат чабышларын яратучыларны Казан ипподромы үзенә чакыра. Монда көндезге икедә Берләшкән Гарәп Әмирлекләре президенты, Татарстан Рәисенең махсус бүләкләре һәм Минтимер Шәймиев кубогына ярышлар башланып китә. Бәйрмәгә килүчеләр шулай ук Раяз Фасыйхов һәм Гөлназ Асаева чыгышларын да тыңлый алачак. Ә ярышларны атаклы спорт комментаторы Дмитрий Губерниев алып бара. Балалар өчен атта йөрү буенча бушлай мастер-класслар да булачак. Керү ирекле. 0+

Татарстан урамындагы Камал театры каршында көндезге бердә эшләүче яшьләр иҗатының «Безнең заман» дип аталган республика ачык телевизион фестиваленең Гала-концерты уза. Республикабызның 15 оешмасыннан 200 катнашучы бер сәхнәдә чыгыш ясый. Керү ирекле. 0+

Сәгать көндезге 11 дә Камал театры каршында «Уйнагыз, гармуннар» фестивале башланып китте. Фестивальдә Айдар Галимов һәм Зәйнәб Фәрхетдинова да чыгыш ясаячак. Керү ирекле. 0+

Көндезге уникедә Кабан буендагы мәйданда «Милли кием» дип исемләнгән милли костюмнар фестиваленә рәхим итә аласыз. Бәйрәм кичке унга кадәр барачак. Чара барышында  Shanu чуваш коллективының, Башкортстан җырчысы  Айдар Исхаков, татар R&B-артисты Elina, Казанның «Җыр түгәрәге» чыгышларын күрергә мөмкин. Кичә Tartar пластик спектакле белән төгәлләнә. Керү ирекле. 0+

Иске Татар бистәсендә узган «Казан сөлгесе» фестивале бүген көндезге икедә Гала-концерт белән төгәлләнчәк. Бу концертта илебездә яшәүче халыкларның бай милли иҗаты белән танышырга мөмкин булачак. Керү ирекле. 0+

Фото: Татар-информ