«Президент белән бергә» республика иҗтимагый хәрәкәте бүлекчәләре Татарстан районнарында ачыла башлады.

«Президент белән бергә»республика иҗтимагый хәрәкәте бүлекчәләре Татарстан районнарында ачыла башлады

Чаллыда «Президент белән бергә» Татарстан иҗтимагый оешмасының җирле бүлекчәсе ачылды. Шәһәр иҗтимагый оешмалары активистлары бу вакыйганы зур өмәгә чыгып билеләп үтте. Файдалы һәм игелекле эшләр башкару максаты белән берләшкән яшьләр һәм өлкән кешеләр шәһәрнең биш мәйданчыгын чүп-чардан арындырды.
Исегезгә төшерәбез, республика лидеры Рөстәм Миңнеханов башлангычы белән 2015 ел Татарстанда парклар һәм скверлар елы дип игълан ителгән иде. Әлеге программа буенча Чаллыга шәһәрнең 10 паркын, шул исәптән, «Гренада»ны төзекләндерү өчен 136 миллион сум акча каралган. 

Шәһәр халкы Рөстәм Миңнеханов проектларына үз өлешен кертергә омтыла: «Гренада» паркындагы өмәгә 200 дән артык Чаллы кешесе килде. «Чиста шәһәр» экологик акциясенә яшьләр дә, Рафик Имайкин (ул «Президент белән бергә» хәрәкәтенең җирле бүлеге координаторы да)  рәислек иткән ветераннар советы да кушылды. «Гренада» паркы шәһәрнең төрле буын вәкилләре өчен дә якын урын бит. Бүген биредә экстремаль спорт төрләре белән шөгыльләнүчеләрнең әти-әниләре 70 нче елларда паркның танцлар мәйданында һәм җәйге кинотеатрда ял иткән. Паркта хәзер спорт һәм ял өчен 14 мәйданчык булдырылган. Шактый зур бу территорияне акциядә катнашучылар 4 төркемгә бүленеп җыештырган.
– Шәһәребез – буыннардан мирас булып күчкән туган йортыбыз ул. Аның матур, чиста, уңайлы булуы үзебездән тора. Шәһәрдә яшәүче һәр кеше урамнан бер кәгазь кисәген генә күтәреп алса да, 500 мең чүп кәгазьдән арыначакбыз, – дип исәпли «Президент белән бергә» республика иҗтимагый хәрәкәтенең Яр Чаллы шәһәре буенча координаторы Рафаэль Вәлиев.
– Май бәйрәмнәрендә шәһәр аеруча матур күренергә тиеш. Быел әле Җиңүнең 70 еллыгы да. Халык паркларда ял итәчәк, табигаькә чыгачак, – дип хуплый аны шәһәр советы каршындагы Иҗтимагый яшьләр парламенты рәисе Андрей Сотников.

Агач ботаклары өчен әзерләнгән контейнер ярты сәгатьтә тулды да. Чүп-чарны аерым капларга җыйдылар. Экологик акциядә катнашучыларга чәй табыны оештырылган иде. Һәр иҗтимагый оешмага атналык эшләрне билгеләүче блокнотлар тапшырылды. Башкарма комитетның яшьләр эшләре идарәсе начальнигы Александр Литвяков паркны төзекләндерү кысаларында быел «Гренада»да ГТО нормаларын тапшыру буенча универсаль мәйданчык ачылачагын хәбәр итте. Анда 400 һәм 100 метрга йөгерү юллары, озынлыкка сикерү, граната ыргыту мәйданнары, электрон тир булачак. Проект 10 миллион сумга төшәчәк. 

Исегезгә төшерәбез: «Президент белән бергә» республика хәрәкәте оешу турында «Без булдырабыз! Без бергә! Мы можем! Мы вместе!» Форумында игълан ителде.