Ләлә Кузнецова фотоларын аңлар өчен...

«Дорога» китабына кереш сүздә Александр Лапин шулай яза. Ә минем Ләләнең ничек фотога төшерүен күргәнем бар менә! 1980–81 елларда «Ялкын» журналы редакциясендә бергә эшләдек. Ләлә белән кыш көне рейс автобусына утырып Яшел Үзәнгә баруыбыз да, галстуклы кызларны­малайларны фотога төшерүләре дә хәтеремдә. Ул, балаларны көлдерергә тырышып, кызык кыяфәтләргә керде, төрле мәзәкләр сөйләде. Ә менә юлда басып кайтканда (автобус халык белән шыплап тулган, хәтта басар урын да юк иде!), күкләрдә очып фотога төшергән Ләлә, җиргә төшеп, гап­гади хатын­кыз булып, көндәлек мәшәкатьләр, кечкенә кызы турында сөйләп кайтты. Аның Казакъстанда – Уральскида туганын, КАИда укыганын, инженер булып эшләгәнен белдем шул чакта. Гади генә сүзләрендә дә ниндидер тирән фәлсәфә ярылып ята. Кечкеә генә Ләләдән энергия ташып тора. Мин аны чегән хатынына охшата идем. Карл Маркс урамындагы авангардик стильдәге фатирында да булган бар иде...

Чегән хатыны дигәннән... Ул чегән таборында яшәп, чегән тормышын өйрәнеп, «Чегәннәр» циклын иҗат итте! «Чегәннәр» – Ләләнең «йолдызлы сәгате»!

Үзен чын мастер итеп дөньяга танытты ул! Төрекмәнстан, Таҗикстан, Үзбәкстан, Одесса далаларында чегән таборында йөрүләр, аларның драмтизм тулы тормышы, сөенечләре һәм хәсрәтләре, холкы, кайнарлыгы – барысы да сыйган ул фоторәсемнәргә. «Чегәннәр – офыкка баручылар. Ә офык һәрчак алардан чиксезлеккә күчә..» Фоторәссам шулай ди. «Фотографиядә кеше күпмедер дәрәҗәдә үз автопортретын ясый ул...» – Монысы да аның фикере.

Үзен Анри Картье­Брессон укучысы дип таныган Ләлә Кузнецова иҗатында очыш чоры әнә шулай башланды. Төрле күргәзмәләр, конкурслар... Күргәзмәләре Россиягә караганда чит илләрдә күбрәк тә була әле! АКШта, Германиядә, Бөекбританиядә 3 зур китабы чыкты! Аклы­каралы фотоларга никадәр шигърият, хис, фәлсәфә, динамика сыйган!..

Түгәрәк юбилеен билгеләп үтүче бу бөек фоторәссамга, нәзберек көчле хатын­кызга, үзебезнең Ләләгә соклануыбызны, яратуыбызны, матур теләкләребезне җиткерәбез!