​Әгъзам Гобәйдуллин Татарстанда узган сайлауларда күпме кеше тавыш биргәненә үз фаразларын җиткерде

Татарстанда VII чакырылыш Дәүләт Думасына сайлауларда күпме кеше тавыш биргәне әлегә билгеле түгел. Шулай да Татарстан Үзәк сайлау комиссиясе рәисе Әгъзам Гобәйдуллин сайлауда катнашучылар санына карата үз фаразын җиткерде. Кичке 18 сәгатькә ул 69,4 процент сайлаучыларның тавыш биргәнен искәртте.

Әгъзам Гобәйдуллин нәкъ 20 сәгатьтә республикада 2 мең 824 сайлау участогы ябылганын әйтте. “Татарстан буенча сайлауда якынча 77 процент кеше катнашкан дип уйлыйм”, - дип белдерде Әгъзам Гобәйдуллин.

ҮСК рәисе кичке 18 сәгатькә Башкортстан Республикасында 53,3, Марий Эл 47,6, Удмуртия 38,4, Самара өлкәсендә 44, 8, Ульяновск 44,6 процент кешенең тавыш биргәнен белдерде.

“Сайлау участоклары ябылуга, комиссия әгъзалары тавышларны санауга кереште. Бу өзлексез, эзлекле процедура. Бу тулы бер эш схемасы”, - диде Әгъзам Гобәйдуллин. ҮСК рәисе башта кулланылмаган бюллетеньнар юкка чыгарылуын, аннары күчерелмә әрҗәләрдәге бюллетеньнарны эшкәртү, аннары стационар әрҗәләрдән тавышлар саналуын, аннан берктемәләр тутыру һәм башка эшләр уздырылуын әйтте.

Тавышлар сайлау башта бер мандатлы сайлау округлары буенча, аннары федераль округ буенча үткәрелә.

Әгъзам Гобәйдуллин сайлау нәтиҗәләре буенча төгәл мәгълүматның барлык бюллетеньнар эшкәртелеп беткәч кенә билгеле булачагын әйтте.

http://tatar-inform.tatar/