Дус яшәүгә ни җитә?

Әлеге чара Татарстан Яшьләр эшләре һәм спорт министрлыгы, Татарларның федераль милли-мәдәни мөхтәрияте, «Идел» яшьләр үзәге, Татарстан Президентының Дини берләшмәләр белән элемтәләр идарәсе теләктәшлегендә оештырыла.

Татарларның федераль милли-мәдәни мөхтәрияте рәисе, Россия Дәүләт Думасы депутаты Илдар Гыйльметдинов фикеренчә, «Максат» фестивале – ул уникаль чара. Үз вакытында мондый чараны оештыру тәкъдиме белән Идел буе федераль округы җитәкчелеге чыккан булган.

- Илебез мөселман яшьләренең ни рәвешле фикер йөртүен, нинди юнәлештә баруын ачыклау өчен Татарстанда шундый фестиваль уздыру турында сүз чыкты. Без бик теләп ризалык бирдек. Яшьләребез ислам үсешенең төп юнәлешләре турында белемне ниндидер газета-журналлардан, чит илләрдән түгел, ә үзебездән тупласын дигән теләк бар, - дип «Максатның» максатларын аңлатып китте Илдар Гыйльметдинов.

Мәгълүм булганча, республикабыздагы ислам бик толерант, башка диннәргә карата ул бик тыныч – нәкъ шушы үрнәкне фестивальгә җыелучы илебез мөселман яшьләренә күрсәтергә омтылалар.

«Идел» яшьләр үзәге мөдире Ләйсән Сафина сүзләренчә, бу юлы Казанга Сарытау, Свердлау, Мәскәү, Самар, Ульян, Иркутски өлкәләреннән, Түбән Новгород, Чиләбедән, Башкортстан, Мордва, Удмурт, Мари Иле, Чуваш республикаларыннан 100 делегат чакырылган. Алар үзләренең дин өлкәсендәге эш тәҗрибәләре белән бүлешәчәк, дөньякүләм танылган җәмәгать эшлеклеләренең, дин галимнәренең, җитәкчеләрнең һәм имамнарның файдалы лекцияләрен тыңлап, яңа белемнәр туплаячак. Шулай ук программада - Казанның күренекле урыннары белән таныштыру, Болгар тарихи шәһәренә бару, «Мәрхәмәт» акциясендә катнашу. Делегатлар хәләл ризык белән тәэмин ителәчәк һәм биш вакыт намаз укыячак.

Сылтама: http://intertat.ru/tt/din-tt/item/44842-rossiya-m%D3%A9selmannaryina-tatarstandagyi-islamnyi-k%D2%AFrs%D3%99t%D3%99l%D3%99r.html