Логотип
Яңалыклар

Бозлавык!

Иртән эшкә ашыгучы халык бүген кирәкле җиренә көч-хәл барып җитте. Таң алдыннан сибәли башлаган яңгыр, җиргә төшүгә, туңып, бозга әдерелде. Машинасының ишеген дә ача алмаучылар (чөнки боз калканы каплап алган иде аларны), таксига өметләнгәннәрдер дә, ләкин иртән пассажирлар ташу белән шөгыльләнүче күп кенә кампанияләргә шалтырату файдасыз иде. Мондый бозлавыкта юлга чыгарга таксистлар да базмады булса кирәк. Иртәнге сәгатьләрдә Казан аэропорты ябык, юл иминлеген кайгыртучы полиция пассажир автобусларын ерак юлга чыгармас өчен, шәһәр артына чыгучы юлларны япты. Трамвай-троллейбуслар бик зур тоткарлык белән генә йөри, тукталышлардагы халык ташкыны трамвайны шактыйдан бирле көтүләрен хәбәр итте.
Иртәнге җидедә башкаланың кечерәк урамнарында юллар һәм сукмаклар көзге кебек ялтырый, анда атлау түгел, басып кына торуы да шактый кыенлык тудыра иде. Сигезенче яртылар тирәсендә көчәеп киткән яңгыр юллардагы бозны эретеп, машиналарга аз булса да йөрү мөмкинлеге тудырды анысы. Җәяүле юллары әле һаман да куркыныч булып кала бирә. Һава торышын фаразлаучылар көндезгә бераз җылытачагын, яңгыр явачагын әйтә. Кичкә таба кабат суытып, юллар тагын көзгегә әверелмәсә ярый.
Юл иминлеге хезмәте машина йөртүчеләрне гаять игътибарлы булырга, акрын йөрергә, кискен туктамаска, каршы як юлга чыкмаска өнди. Аеруча җәяүлеләр сак булсыннар иде, машина безгә юл бирергә тиеш, дип, җәяүле кичүенә берүк машина алдыннан килеп керә күрмәгез. Бозлы юлда сәгатенә 60 чакрым тизлек белән килүче машинаны туктатыр өчен 116 метр ара кирәк булуын онытмагыз.

Следите за самым важным и интересным в Telegram-каналеТатмедиа

Комментарий юк

Хәзер укыйлар