Бүген WorldSkillsның эшлекле программасы башланды

Бүген WorldSkills 2019 халыкара чемпионат кысаларында WorldSkills Conference 2019 конференциясенең тантаналы ачылышы узды. Анда Россия хөкүмәте Рәисе урынбасары Татьяна Голикова, Татарстан Президенты Рөстәм Миңнеханов катнашты.

«Дөнья — куркыныч астында: үзгәрешләр чорында җайлашу, уңышка ирешү һәм чәчәк ату өчен күнекмәләр» темасын ачкан пленар утырышта чыгыш ясаган Татьяна Голикова белдерүенчә, бүген хезмәткәрләрнең 23 проценты үз һөнәрләренә туры килмәгән эш башкара. Ул Россия хезмәт базарында квалификацияле белгечләргә кытлык булганын искәртте. Әлеге проблеманы хәл итү өчен укыту программаларын киңәйтү ,берничә һөнәр алу мөмкинлеген булдыру кирәклеген әйтте. WorldSkills хәрәкәте моңа ярдәм итә. WorldSkills стандартлары буенча демонстрацион имтихан биреп, Skills Passport алучыларны илдә 200 ләп эш бирүче кабул итәргә әзер. Әлеге документта компетенция дәрәҗәсе күрсәтелә. Россиядә 90 меңнән артык белгеч мондый паспорт алган инде. 

Татарстан Президенты Рөстәм Миңнеханов Татарстанда һөнәри урта белем бирү тармагына игътибарның зур булуын әйтте. «Төп максат - кеше капиталын булдыру", – диде Президент төбәкнең уңыш серен ачып. Рөстәм Миңнеханов республикада 37 ресурс үзәге булдырылганын, 2020 елга алар санын 41 гә җиткерергә теләүләрен әйтте. 

Эшлекле программа кысаларында Америка язучысы, элекке трейдер һәм риск-менеджер Нассим Талеб чыгыш ясады. «Уңыш ялгышлар аша килә», – диде ул. Ялгышлыклар методы хакында бәян итте. «Иң күп банкротлык Калифорниядә урнашкан Силикон үзәнлегендә», – дип белдерде. Аның фикеренчә, банкротлык иң яхшы укытучы.