Логотип
Яңалыклар

Алтын каләмне эзлибез!



«Алтын каләм – Золотое перо» фестивале тагын яшь журналистларны җыя! Иртәгә, 3 июльдә Яшьләр Үзәге базасы булган«Волга» лагеренда XXIV«Алтын каләм» республика фестивале старт алачак һәм ул 7 июльгә кадәр дәвам итәчәк. Фестивльдә катнашырга теләүчеләр саны быел 200 дән дә артып китә. Бу хакта бүген журналистларга матбугат конференциясендә җиткерделәр. Әлеге чарада Дәүләт Советы рәисе урынбасары Римма Ратникова (ул «Алтын каләм» фестивален оештыручыларның берсе, аны «фестивльнең әнисе» дип йөртәләр), «Татарстан–Яңа гасыр» телерадиокомпаниясенең генераль директоры, Татарстан журналистлар берлеге рәисе Илшат Әминов, КФУ ның Журналистика һәм медиакоммуникацияләр югары мәктәбе җитәкчесе Леонид Толчинский, Татарстан Республикасы яшьләр эшләре министрының беренче урынбасары Тимур Сөләйманов, Республика яшьләр хөкүмәте рәисе Алла Абросимова катнашты һәм чыгыш ясады. 

«Алтын каләм» фестивале 1996 елда Балалар һәм яшьләр эшләре буенча Дәүләт комитеты, Татарстан журналистлар берлеге, Казан дәүләт университетының журналистика факультеты, Татарстан Республикасы Матбугат һәм мәгълүмат министрлыгы катнашында барлыкка килгән иде. Шул чордан башлап Фестиваль аша якынча 10 меңнән артык егет һәм кыз узды. Аларның күбесе инде үзен массакүләм матбугат чараларында тапты, исемле журналистлар булдылар. «Алтын каләм» бүген дә мәктәп укучылары, башлап язучы яшь журналистлар арасында бик популяр. Һәм ул – яңарышта. 

Фестиваль көннәрендә каләмчеләрне мастер-класслар, иҗади конкурслар, кызыклы шәхесләр, журналистика мэтрлары белән очрашулар көтә. Яшь журналистлар 7 юнәлештә эшләячәк – басма журналистика, телевидение, радио, мультимедиа, фотожурналистика, дизайн һәм верстка. Татарстан Республикасы мәгълүмат кырының актуаль көн тәртибендә торган темалар фестиваль тормышында киң чагылачак. Татарстанда эшче һөнәрләр дөнья чемпионаты WоrldSkills Kazan 2019 га, Татарстан Республикасында яшьләр дәүләт сәясәтенә 25 ел тулуга, Фәнни-популяр журналистикага, ТАССР төзелүнең 100 еллыгына, 2019 ел – Россиядә театр елына багышланган язмалар, видеосюжетлар, радиотапшырулар, фотокүргәзмәләр, рус һәм татар телләрендә көн саен чыгып барган газеталар кызыклы һәм кабатланмас булыр дип көтелә. 

Традиция буенча фестивальнең Гран-при ияләре Татарстан Президенты Рөстәм Миңнеханов карары белән Татарстан Республикасы бюджетыннан бүлеп бирелгән грант акчалары хисабына КФУда «Журналистика» белгечлегенә уку мөмкинлеге алачак. Быел беренче тапкыр «Телевидение» юнәлешендә грант алган җиңүчене билгеләячәкләр. 

Димәк, «Алтын каләм»нәрне эзли башлыйбыз! Старт бирелде! Иҗат уңышлары сезгә, каләмнәр! 

                                                    

Следите за самым важным и интересным в Telegram-каналеТатмедиа

Комментарий юк

Хәзер укыйлар