​«Аксенов-фест»та Гүзәл Яхина да булачак!

Әдәби-музыкаль фестивальдә прозаик Евгений Попов һәм Александр Кабаков, Казаннан әдәби тәнкыйтьче Алексей Саломатин, актер Вениамин Смехов, прозаик Денис Драгунский, шагыйрә Ирина Ермакова, Юрий  Щербаков җитәкчелегендәге «V.Aks Band» джаз коллективы һәм башкалар катнашачак. Шулай ук талантлы язучы, Мәскәүдә яшәп иҗат итүче якташыбыз Гүзәл Яхина да  – фестиваль кунагы. Ул «Зөләйха күзләрен ача» («Зулейха открывает глаза») дигән романы белән әдәбият дөньясында чын мәгънәсендә дебют ясады: әсәре ел ачышы булды. «Сөембикә» укучыларын алдан ук сөендереп куябыз: журналның сентябрь санында инде алар Зөләйха турындагы әсәрне укый алачак! 
 Тугызынчы ел рәттән Казанда узучы фестивальнең инде үз традицияләре барлыкка килде. Ул ел саен нинди дә булса яңалыгы белән сокландыра.

Быел «Яңа татар шигърияте антологиясе» китабы чыгу белән истәлекле ул. Анда 22 татар һәм 8 рус шагыйренең иҗаты урын алган. 

11 сентябрь көнне Казан ратушасында китапны тәкъдим итү була. Ул музыкаль спектакль формасында узачак. Шагыйрьләр Булат Ибраһим, Рифат Сәлах, Йолдыз Миңнуллина, Дания Нәгыймуллина һәм башкалар үз әсәрләрен укыячак.

Казан башкарма комитетының мәдәният идарәсе башлыгы Айгөл Горнышева билгеләп узганча, фестиваль башкаланың мәдәни тормышында аерым урын били. «Чара Казан мэриясе һәм ТР Президенты вазифаларын вакытлыча башкаручы Рөстәм Миңнеханов ярдәме белән уза», - дип билгеләп үтте ул.

Аның сүзләренчә, фестиваль Казанда Василий Аксенов исемендәге скверны ачу белән тәмамланчак. Ул шәһәр үзәгендә, «Мир» кинотеатры артында урнашкан. Фестиваль тәмамланган көнне катнашучылар Язучылар аллеясенә агачлар утыртачак.