Балык көне

Бәрәңгеле балык. Өлешләп туралган сөяксез балык итенә тоз, борыч, лимон согы, үсемлек мае һәм туралган укроп сибеп, 1,5-2 сәгать суык урында то­тыгыз. Аннары майонезга чи йомырка, он кушып туглап сыек камыр (кляр) яса­гыз. Шуннан соң балык итен камырга манчып, эре угычта уылган чи бәрәңге йо­мычкасында әвәләгез. Балыкны ике яклап үсемлек маенда кыздырыгыз.
Дүрт өлеш өчен: 600 грамм сөяксез балык ите, 2 бәрәңге, 1 лимон согы,
4 аш кашыгы үсемлек мае, укроп, борыч, тоз; камыр (кляр) өчен: 2 аш кашыгы майонез, 1 чи йомырка, 1 аш кашыгы он кирәк.

Майонезлы минтай. Өлешләп кискәләнгән балык итен майланган табага тезеп, өстенә тоз һәм борыч сибегез. Аннан соң табадагы балык итенә боҗралап туралган суган, эре угычта уылган сыр һәм майонез сибеп, әзер булганчы мичтә пешерегез.
Дүрт өлеш өчен: 800 г минтай ите, 3-4 баш суган, 100 г каты сыр, 8 аш кашыгы майонез, 2 аш кашыгы үсемлек мае, төелгән кара борыч һәм тоз кирәк.

Карабодай боткасы белән балык. Сөяксез балык итен өлешләп кискәләгез. Шуңа тоз, борыч сибеп онда әвәләгез дә һәр ике ягын үсемлек маенда кыздырыгыз. Аннары карабодай боткасын пешереп, майлан­ган табага салыгыз. Табаның уртасын ачып балык тезегез, өстенә кыздырыл­ган суган сибегез.
Шул боткалы балыкка иң элек томат соусы, аннан соң уылган сыр сибегез.
Өстенә атланмай кисәкләре куеп, мичтә 30 минут пешерегез.
Дүрт өлеш өчен: 2 тәрәч балыгы, 1 стакан карабодай ярмасы, 2 аш кашыгы уылган сыр, 2 баш суган, 1 стакан томат соусы, 2 аш кашыгы он, 3 аш кашыгы усемлек мае, 3 аш кашыгы атланмай, борыч, тоз кирәк.

Балыктан — рагу. Үсемлек маен кәстрүлгә салып, уртача утта җылыты­гыз. Шуңа тоз һәм туралган суган салып йомшарганчы пешерегез. Аннары суганга кисәкләп туралган бәрәңге, шулпа, помидор һәм 1 стакан кайнар су салыгыз. Шу­ны көчле утта кайнатып чыгарыгыз да, утны акрынайтып, әзер булганчы томалап пе­шерегез. Аннан соң балык ите салып, яңадан 8-12 минут (балык үтә күренмәле бул­ганчы) пешерегез.
Алты өлеш өчен: 600 грамм сөяксез һәм кабыксыз балык ите, 3-4 бәрәңге, 400 грамм консервланган помидор, 2 стакан тавык шулпасы, 1-2 баш суган, 1 аш ка­шыгы зәйтүн яисә көнбагыш мае, ярты чәй кашыгы тоз кирәк.

Балык шарчыклары. Балыкны пешереп кабыгыннан һәм сөягеннән әрчегез дә чәнечке белән изгәләп ваклагыз (иттарткычтан чыгарсагыз да була). Шуңа пешкән бәрәңге яисә бәрәңге боламыгы, чи йомырка, эретелгән атланмай, тоз һәм борыч салып болгатыгыз. Шул катнашмадан зур булмаган шарчыклар ясагыз. Шар­чыкларны онда әвәләп, үсемлек маенда кыздырыгыз.
Дүрт өлеш өчен: 500 грамм балык ите, 600 грамм бәрәңге,
1-2 йомырка, 1 аш кашыгы атланмай, 3 аш кашыгы он, 3 аш кашыгы үсемлек мае, борыч, тоз кирәк.