Логотип
Икенче ашлар

Американча иртәнге аш

Иделияне кемнәрдер «Татарстан-Яңа гасыр» каналындагы «Яшьләр тукталышы» тапшыруының алып баручысы буларак хәтерлидер. Кемгәдер ул татар эстрадасына яңалык булып килеп кергән җырлары белән таныш. Экраннар­дан ник юк булды, дисәк, Иделия Америкага ук китеп, Майамида яши икән. Бәйсез компания белән килешү төзеп, Америкада җырлар яздыру белән мәшгуль. Бүген ул «Сөембикә» укучыларына Майа­ми-ларның бик яраткан иртәнге ашын әзерләп күрсәтә (гәрчә америка­лылыр үзләре ашарга әзерләми, кафеларда туклануны хуп күрә икән). Әчкелтем бу ризык йокыны ача, күңелне күтәрә.

Кирәк:

(бер кеше өчен)

* 1 әзер күзикмәк (калынрак булса әйбәт);
* 1 кызыл помидор;
* ярты баш суган (кызылы яхшырак);
* 1 кисәк татлы борыч;
* 2 йомырка;
* 5-6 шампиньон;
* 1 тәгәрмәч халапиньо дигән яшелчә (ачы борыч белән алыштырып була);
* 50 г каты сыр;
* 0,5 бал кашыгы лимон суты;
* зәйтүн мае;
* аштәмләткеч үләннәр.
 

Эш барышы:


Иң элек яшелчәләрдән соус әзерлибез. Моның өчен помидор, суган, аштәмләткеч үләннәр һәм орлыгыннан арындырылган баллы борыч белән халапиньоны бик вак итеп турыйбыз. 
Туралган яшелчәләрне бер савытка бушатып, тәменчә тоз сибәбез. Лимон суты һәм 1 бал кашыгы зәйтүн мае салып, бик яхшылап болгатабыз.

Эре итеп туралган гөмбәләрне майлы табада кыздырабыз. Гөмбә әзер булгач, йомыркаларны сытабыз, тоз сибәбез. Тәбәне сыеклыгы бет­кәнче болгата-болгата кыздырабыз.Йомырка өстенә сыр уып сибәбез.

Күзикмәкнең бер читенә иң элек гөмбәле тәбәне салабыз. Аның өстенә соусны түшәп, күзикмәкне тәгәрәтеп төрәбез.

Коры табаны кыздырып, төргәге­безне шунда салабыз һәм ике ягын да җиңелчә генә кызартып алабыз.

Табынга аны урталай бүлеп чыгарабыз. Янына кибет каймагы куябыз.

P. S. Бу ризыкны үзегез яраткан теләсә кайсы яшелчәдән әзерләп була. Гөмбә урынына ит ризыклары куллансаң да ярый.
 

Галерея

Следите за самым важным и интересным в Telegram-каналеТатмедиа

Комментарий юк

Хәзер укыйлар