Дөнья тар икән лә!


Дөнья тар икән лә! Казанда яши башлагач, тагын да ныграк инанырга туры килде моңа. Кем белән генә сөйләшә башлама, ул кеше синең танышыңның танышы, йә булмаса – туганы булып чыга. Алай да булмаса, танышларыңның чыбык очы олы кодасының кече малайларына барып чыгасың. Һич югында, Салават, Хәния, Җәвит якташлары дип булса да, үзебезне туганлаштырабыз куябыз. Чөнки аларның танышларының танышлары белән синең танышларыңның танышлары бик дус, яхшы һәм җылы мөнәсәббәттә яшәп яткан булып чыга. Кайчак куркып та куясың, Казанда сиңа таныш булмаган берәр кеше бар микән? Ышто-то ышанасы килми!

Казан федераль университеты профессоры туып үскән авыл белән безнең авыл арасы нибары ун километр чамасы булыр. Казанга күченгәнче, аны район сабантуйларына кайткан кадерле кунаклар арасында күреп калгалаган булды. Университетка эш белән сугылуымның берсендә, мин якташ профессор абзыем белән якыннанрак танышырга уйладым. Сүз, әлбәттә туган яклар, якташлардан башланып китте. Тумышым белән кайсы авылдан икәнемне белгәч: «Карале, син шул кешене беләсеңме?» - дип, әниемнең бертуган энесен атады. Ничек инде белмәскә! Шулай да: «Беләм»,- дип кенә чикләндем, абый икәнен әйтү-фәлән юк. Кем белә, бәлки аларның арасын берәр четерекле тарих бәйлидер. Үзем эчтән генә уйлыйм: «Абый яшьтән ук талантлы, актив, һәр эшләгән эшендә мактаулы булды. Яшь чакларыннан алып олыгайганчыга кадәр тормыш иптәше белән сәхнәдән төшмәделәр. Авылда алардан да мәхәббәтле пар булды микән? Неужәли?..»

Уйларымны бүлеп, профессор абзый истәлеге белән уртаклаша башлады. «Үткән гасырның җитмешенче еллары. Башкортостанда партия райкомында эшләгән чак. Бер елны сезнең авылга сайлаулар вакытында вәкил итеп җибәрделәр. Колхозның комсомол оешмасын җитәкләгән егет сайлау комиссиясе председателе итеп билгеләнгән булып чыкты. Ул мине матур итеп каршы алды, аннан әзерлекне карап чыктык. Зал уртасында кабымлыклар тезелгән өстәл дә тора. Председатель өстәл уртасындагы графиннан кечкенә кырлы стаканга су салып, миңа тәкъдим итте. Үзенә дә салды. «Кыстаганда су да эч!» - ди безнең халык, шактый гына сусаткан да иде, суны йотып та җибәрдем.

Баксан… графиндагы су «градуслы» булып чыкты! «Нишләп графин тулы килеш тора, һаман бушатмаганнар» - диюемә ул: «Графинга зу-у-ур ата чебен салып куйдым, су эчәргә теләгән кеше шуны күрә дә, эчмичә борылып китә» - ди. Рәхәтләнеп көлештек».

Профессор абзый ихлас тагын бер кеткелдәп көлеп куя да: «Менә шундый мәрәкә, якташ! Ары-бире, авылга кайткан чагында очратсаң, сәлам әйт үзенә, шәп егет иде» - дип, сүзен тәмамлый.

-Беләсезме, ул егет минем абыем бит! «Кит аннан!» - ди, аптыравын яшермичә,- дөнья тар икән лә!»

Авылда туганнар белән бер табында җыелганда: «Абый, ярты Казан сине белә»- дип, әзрәк «су да кушып», «чебенле графин» тарихын исенә төшердем. «Кушкан суым» теге графиндагы су кебек «градуслы» түгел иде түгеллеккә, әмма эффектлы булды. «Карале, Казанга бер тапкыр да барып карамаган кешене дә анда беләләр икән, менә бит дөньяның тарлыгы!» - дип, олыраклар хаттә тел шартлатты.

«Әәә, нәрсә дисез? Җиткердем, җиткердем сәламен профессорның. Үзенә дә төяп алып килдем. Сәлам инде, сәлам, әллә нәрсә уйламагыз тагын. Университетка укырга керәсе кешебез юк… әлегә».
фото: https://pixabay.com

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (2)
Cимвол калды:
  • 4 октябрь 2019 - 08:37
    Без имени
    Куптэн тугел генэ тормыш иптэшем белэн энгэмэлэшеп алдым Шул турыда , Эгэр дэ тикшереп китсэк , нэсел жеплэре, тамырлары бик тэ кин жэелгэн икэн .
  • 2 август 2021 - 08:20
    Без имени
    Куреп алдым да , ян,а куйган язмагызны . бер тында укып та чыктым . Бик кун,елле , матур эсэр булган бу !!!
Хәзер укыйлар
  • Үги әнкәйнең җылы йөрәге «...Үги ананың бик әйбәтләре була. Гадәттә, алар турында гел яман сөйлиләр, ләкин алар турында юньле сүзне күбрәк сөйләргә кирәк. Чит канга ана булырга тырыша бит ул. Мәҗбүри яратып булмый бит. Ә ул рольгә кереп «уйнарга» тиеш. Бала исә рольгә керми, «уйнамый». Ике артистның берсе уйнап, икенчесе уйнамаса, спектакль туа алмый. Үги аналы гаиләдә әнә шуңа күрә җылы, уңай тормыш коруы бик кыен. Үги аналарны кызганырга, ихтирам итәргә кирәк...» Мөхәммәт Мәһдиев «Мәңгелек яз» әсәрендә үги әниләр турында әнә шундый уйлануларын язып калдырган. Үги тормышны үз башына төшкәннәр генә аңлыйдыр, мөгаен. Үги ананың да, үги баланың да үз хәле... Әмма гомер уртасына җиткән ир балачагын искә алганда «Үги әниләргә һәйкәл куярга кирәк», – ди икән, димәк, барлык үги әниләр дә, халык телендәге кебек, явыз түгелләр. Чит балаларны карап үстерә икән, димәк, алар олы йөрәкле... Үги әни белән үскән Татарстанның халык артисты Җәвит ШАКИРОВ үзе сөйләсен әле...
    9460
    10
    114
  • Бәхетле булырга хакым бар!  Мин кияүгә 25 яшемдә чыктым. Яратып чыктым...
    9590
    8
    78
  • Өч кенә көнгә... – Кирәкми. Кешечә түгел бу. Шалтыратмагыз. Өметләнеп көткәнче, алдан ук барысын да аңласын. Башка бер сүз дә әйтмичә, нянечка балалар янына кереп китте. Ишек тавышы йөрәкне сызып үткән кебек булды. Бар да тынып калды. 
    5274
    4
    62
  • Көтеп алынган бәхет Әллә күзенә күренәме, сискәнеп китте Гөлгенә. Каршысында пәйда булган Гамилне күргәч, ни уйларга да белмәде, чөнки бу  очрашу көтмәгәндә, кинәт булды. Унсигез еллап гомер үтсә дә, шундук  таныды  аны: шул ук озын буй, киң җилкә, серле караш, тик куе кара чәчләренең чигә тирәләренә ак бәс яткан. Күзләрендә ниндидер сагышмы, назмы...
    4056
    0
    44
  • Сөеп, сөелеп яшисем килә-2 «Таһирә өстеннән жалу язганнар» дигән хәбәр авылда таралганга да бер айга якын вакыт үтте. Тегеләй дә, болай да дип тикшергәннән соң: «Фактлар ачыкланмады», дигән.
    6475
    2
    30
Реклама
Соңгы комментарийлар
Реклама
«Азат хатын» күргәзмәсе – Кабан күле буенда
«Сөембикә»нең яңа саны һәм... балчык
Әлфия Миңнуллина: «Әни Казанга яланаяклы кыз булып килгән иде, яланаяк мәңгелеккә китеп бара...»
Фарфор буенча рәссам Римма Газалиеваның шәхси күргәзмәсе
Укучыга таба яңа адым: «Сөембикә»нең февраль санын тәкъдим иттек 
Венера Ганиеваның ире, тавыш режиссеры Камил Фәйзрахмановны соңгы юлга озату
Беренче дулкын. Өмет, курку, хисләр
Татарстан журналистикасы тарихы – фотоларда
Бу – безнең уртак тарихыбыз
Журналыбыз архивыннан