​Эссе кояш астында... Яңа ел

Могҗизалы Яңа ел һәркемнең тормышында бер булса да буладыр инде ул. Миндә дә бар! Шуны сезгә дә сөйлим әле.

Ике ел элек гаилә дусларыбыз белән бергә Яңа елны дөньяның бөтенләй икенче ягында каршыларга булдык. Казандагы салкын, карлы кышны калдырып... Доминиканага китеп бардык.

Ә хәзер күз алдына китерегез: урамда 30 градус эссе, кояш яндыра, без океан янында, өстебездә – юка күлмәк яки су коену костюмы. Яңа елны шушылай каршылыйлармени?! Без бит болай ияләшмәгән! Өстәвенә сәгать аермасы бар – җиде сәгать!

Безнең вакыт буенча төнге 12 якынлашканда, аларда көндезге сәгать 5 кенә иде әле. Тиз генә җыенып, пляждан отельгә кайттык. Үзебезчә кечкенә генә өстәл кордык. Башка вакыттагы кебек салатлар да, пилмәннәр дә юк иде, әлбәттә, табыныбызда. Телевизорны 1 нче каналга көйләдек тә, көтәбез: тиздән Илбашы сөйләргә тиеш бит. Зәңгәр экранда «Огонек» бара: бер җырчыны икенчесе алыштыра. Әледән-әле сәгатькә күз салабыз: безнең исәп буенча, Президент әллә кайчан чыгышын башларга тиеш бит инде. Унике туларга биш минут, дүрт минут, өч минут... Сәгать телләре унике санына якынлашырга ике минут калганда, бернинди чыгышлар, Илбашының котлавы булмаячагын аңладык. (Бу үзенә күрә бер сәясәт булуын соңыннан гына төшендек шул. ОРТ каналы Доминиканада Америка аша транслацияләнә икән.) Отельнең балконына чыктык та, шампан шарәбен ачтык һәм бер-беребезне Яңа ел белән котлый башладык:

-​ Бәйрәм белән!

-​ Бәхетле ел булсын!

-​ Яңа еллар котлы булсын!

Урамнан узып баручыларны, отель хезмәткәрләрен безнең шулай бар кешедән алда бәйрәм итүебез әлләни шаккатырмады бугай. Алар монда төрлесен күргән. Россиядән килүебезне дә шунда ук аңладылар, хәтта русча котлаучылар да булды.

Ә аннан, җиде сәгатьтән соң, аларча Яңа ел башланды.

Кар булмаган җирдә Яңа елны ничек каршыларга җыенуларын күзәтү үзе бер кызык. Иртәдән үк отельне бизи башладылар. Төсле утлар элмәгән бер агач калмады. Бер пальма да! Бассейннарның берсен судан бушаттылар. Аның эченә өстәлләр куйдылар, аларны да бизәделәр. Кичке ашка шулкадәр күп ризык чыгардылар – ис китмәле. Ни генә юк! Бүген дә күз алдымда. Уртага бер көймә куеп, аны диңгез ризыклары белән тутырдылар. Лобстерлар, омар, кыслалар, төрле-төрле креветкалар... Доминикананың үзендә яшәүчеләр дә Яңа елны каршыларга отелгә килә икән. Безнең сыман хәлдән тайганчы өйдә ризык әзерләп ятмыйлар. Шуңа күрә, Яңа ел төнендә отель халык белән тулган була.

Шундый бай бәйрәм программасы оештырганнар иде. Әмма иң күңеллесе иң ахырда булды бугай. Отель безнең һәрберебезгә сюрприз әзерләгән булып чыкты. Кичке аштан соң, номерга кайтып керсәк, бүлмәдә безне бүләк көтә. Кыш бабай кайда да үз эшен онытмый!

Буранлы, карлы, суык Яңа елны эссе кояш астында каршылау ничек инде могҗиза булмасын?! Бер тәүлек эчендә ике тапкыр бит әле ул! Яңа елны каршылаганнан соң, диңгезгә барып су коену – тагын бер могҗиза лабаса. Шуңа да ул күңелләрдә озак сакланыр. Дусларыбыз белән очрашкан саен искә төшерәбез. Бигрәк тә Яңа ел төннәрендә...

«Сөембикә» журналын яратып укучы һәркемне Яңа ел белән котлыйсым килә. Быел мин бу Яңа елдан яңа могҗизалар көтәм. Яңалыклар көтәм. Ел саен шулай инде мин. Ләкин быел – аеруча көтәм. Могҗизаларга ышансаң, алар синең тормышыңда, һичшиксез, булачак! Ышанырга гына кирәк! Һәм күрә белергә!

Һәммәгезгә дә күңел тынычлыгы, гаилә бәхете, исәнлек телим. Дөньялар имин булсын! Балаларыбыз сөендереп торсын. Бар теләгәннәребез чынга ашсын! Эт елы килә. Ә ул тугрылыкны, дуслыкны аңлата. Димәк, киләсе елда бар да әйбәт булачак.

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (0)
Cимвол калды:
Хәзер укыйлар
  • Үги әнкәйнең җылы йөрәге «...Үги ананың бик әйбәтләре була. Гадәттә, алар турында гел яман сөйлиләр, ләкин алар турында юньле сүзне күбрәк сөйләргә кирәк. Чит канга ана булырга тырыша бит ул. Мәҗбүри яратып булмый бит. Ә ул рольгә кереп «уйнарга» тиеш. Бала исә рольгә керми, «уйнамый». Ике артистның берсе уйнап, икенчесе уйнамаса, спектакль туа алмый. Үги аналы гаиләдә әнә шуңа күрә җылы, уңай тормыш коруы бик кыен. Үги аналарны кызганырга, ихтирам итәргә кирәк...» Мөхәммәт Мәһдиев «Мәңгелек яз» әсәрендә үги әниләр турында әнә шундый уйлануларын язып калдырган. Үги тормышны үз башына төшкәннәр генә аңлыйдыр, мөгаен. Үги ананың да, үги баланың да үз хәле... Әмма гомер уртасына җиткән ир балачагын искә алганда «Үги әниләргә һәйкәл куярга кирәк», – ди икән, димәк, барлык үги әниләр дә, халык телендәге кебек, явыз түгелләр. Чит балаларны карап үстерә икән, димәк, алар олы йөрәкле... Үги әни белән үскән Татарстанның халык артисты Җәвит ШАКИРОВ үзе сөйләсен әле...
    8930
    10
    104
  • Бәхетле булырга хакым бар!  Мин кияүгә 25 яшемдә чыктым. Яратып чыктым...
    9019
    8
    73
  • Өч кенә көнгә... – Кирәкми. Кешечә түгел бу. Шалтыратмагыз. Өметләнеп көткәнче, алдан ук барысын да аңласын. Башка бер сүз дә әйтмичә, нянечка балалар янына кереп китте. Ишек тавышы йөрәкне сызып үткән кебек булды. Бар да тынып калды. 
    4730
    4
    55
  • Сөеп, сөелеп яшисем килә-2 «Таһирә өстеннән жалу язганнар» дигән хәбәр авылда таралганга да бер айга якын вакыт үтте. Тегеләй дә, болай да дип тикшергәннән соң: «Фактлар ачыкланмады», дигән.
    5977
    2
    26
Реклама
Соңгы комментарийлар
Реклама
«Азат хатын» күргәзмәсе – Кабан күле буенда
«Сөембикә»нең яңа саны һәм... балчык
Әлфия Миңнуллина: «Әни Казанга яланаяклы кыз булып килгән иде, яланаяк мәңгелеккә китеп бара...»
Фарфор буенча рәссам Римма Газалиеваның шәхси күргәзмәсе
Укучыга таба яңа адым: «Сөембикә»нең февраль санын тәкъдим иттек 
Венера Ганиеваның ире, тавыш режиссеры Камил Фәйзрахмановны соңгы юлга озату
Беренче дулкын. Өмет, курку, хисләр
Татарстан журналистикасы тарихы – фотоларда
Бу – безнең уртак тарихыбыз
Журналыбыз архивыннан