Яшьләрчә һәм җылы

Яшь чагында бер дә башка киясе килми бит ул. Башлыкны килешми дип табасың, яулыкны өлкәннәр генә бәйли дисең. Әниләрнең үзәге өзелеп калганын да уйламыйсың, салкыннан колаклар чымырдаса да сер бирмисең. Яшьләрнең модалы күренәсе килә. Бүген без тәкъдим иткән муенлы капюшон күпчелек кызларның күңеленә хуш килер дип уйлыйбыз. Аны бәйләү артык катлаулы түгел. Пальто төсенә туры килгән җеп тапсаң, калганы — ике-өч көнлек эш.
Мастер-классны «Сөембикә» укучыларына күптәннән таныш Ания ГАТАУЛЛИНА үткәрә.
 

Кирәк: 

* 133м/100 г 3 йомгак бәйләү җебе (50% йон, 50% акрил);
* 5 нче номерлы бәйләү энәләре;
* 1 м тар атлас тасма (киңлеге 1 см);
* зур күзле тегү энәсе.

Эш барышы:

 Энәгә 80 күз җыябыз. Бу 56–58 нче баш үлчәменә туры килә.
 
10 рәт 2 уң, 2 сул күздән торган резинка бәйлибез (бәйләм әйләнә буенча бәйләнә).

 11 нче рәттә тасма уздыру өчен тишекләр ясала. Моның өчен: энәгә җеп чалып, 2 күзне бергә уң белән бәйлибез. Шул рәвешле рәтне бәйләп чыгабыз.
 
12 нче рәттән 2 уң, 2 сул күз белән резинка бәйләүне дәвам итәбез. Резинка белән тагын 28 рәт бәйлибез. Барлыгы 20 см бәйләргә кирәк.

 39 нчы рәттән бәйләмне һәр ике күздән соң бергә арттыра барып (40 күз өстәлә), күзләр санын 120 гә җиткерәбез.

40 нчы рәттән (уң як) бизәк белән бәйли башлыйбыз: 1 нче күз бәйләнми генә алына, 9 күз «энҗе бизәк» белән бәйләнә, 2 уң, 1 сул, 9 күзне рәсем-дәге үрнәк буенча бәйлибез, 1 сул, 74 күз уң, 1 сул, 9 күз үрнәк буенча, 1 сул, 2 уң, 9 күз «энҗе бизәк»,
1 (соңгы күз) уң.

 «Энҗе бизәк»не бәйләү тәртибе түбәндәгечә: 1 уң, 1 сул, 1 уң, 1 сул...

Икенче рәтне бәйләгәндә уң урынына – сул, сул урынына уң күз бәйлибез.

41 нче рәт (сул як): 1 нче күз бәйләнми генә алына, 9 күз «энҗе бизәк», 2 сул, 1 уң, 9 сул, 1 уң, 74 күз сул, 1 уң, 9 сул, 1 уң, 2 сул, 9 күз «энҗе бизәк», 1 сул. 

Капюшонның биеклеге 30 см булгач (муен өлешен санамыйбыз), кыл уртадан күзләр санын киметә башлыйбыз: 59–60 һәм 61–62 нче күзләрне бәйләгәндә ике күзне бергә бәйлибез. Игътибар: 61–62 нче күзләрне бәйләгәндә энәне өстән тыгабыз. Киметү бары тик уң якны бәйләгәндә генә башкарыла. 

Бәйләм 40 см булганчы, гел шулай киметә барабыз. 40 см бәйләгәч, күзләрне япмый гына, капюшонның түбәсен трикотаж җөе белән тегәбез. Җепнең очын яшерәбез. 

Капюшонны үтүкләү тактасына салып, үтүкнең табанын бәйләмгә тидерми генә пар белән үтүклибез. Тишекләр аша тасма уздыргач, үзе заманча, үзе җылы баш киемебез әзер.

Менә хәзер көзге салкын җилләр безгә куркыныч түгел!
 

Үрнәк схемасы

– уң күз
– ике күзне бер итеп, сулга авыштырып бәйләү (энә күзнең өстеннән кертелә) 
– ике күзне бер итеп, уңга авыштырып бәйләү (энә күзнең астыннан кертелә)