Психологлар әйтүенчә, шулпалы аш ныклы, чын гаиләдә ешрак пешерелә. Шул күзлектән караганда, аеруча ир-атны аш белән ешрак сыйларга киңәш ителә. Ялгызак кешегә дә кайнар аш белән “җылынып алу” файдалы, диләр.
Әйе, токмачлы аш, щи, борщ ише ашларны пешермәгән хатын-кыз юктыр ул. Шулай да кайвакыт өйдәгеләрне нинди дә булса яңарак аш белән дә шаккатырасы килә. Шуңа күрә әлеге рецептлар күпләргә кулай булыр дип ышанабыз.
Киңәшемә колак салыгыз
- Шулпалы аш тәмлерәк булсын өчен пешеп чыгар алдыннан аңа бераз сыр уып салыгыз.
- Сарык шулпасы әзерләгәндә иң элек сөякле итне майлы табада көрәнсу төскә кергәнче кыздырып алыгыз. Аннары гына су салып шулпа пешерегез. Ә шакмаклап туралган кишер, бәрәңге һәм суганны аш пешеп җитәр алдыннан гына салыгыз.
- Менә мондый ипи аш белән ашау өчен бик тәмле була. Иң элек ипине шакмаклап турап майлы табада кыздырыгыз. Аннан соң җылы килеш кәстрүлгә тутырып, өстенә туралган сарымсак сибегез. Кәстрүлне капкачлап селеккәләгез.
- Аш янына сарымсаклы ипине түбәндәгечә дә әзерләргә мөмкин. Башта күмәчне телемнәрен кисеп чыгармыйча гына кискәләгез. Һәрберсе арасына бер шакмак атланмай һәм туралган сарымсак сибеп, күмәчне фольгага төрегез. Шуны мичкә куеп, тәмле ис чыга башлаганчы тотыгыз.
Төсле кәбестә ашы
Төсле кәбестәне (200 г) яфракларын аергалап, тозлы суда пешереп алыгыз. Аннары 1 чәй кашыгы онны атланмайда кыздырып, кәбестә пешкән суда 10 минут кайнатыгыз. Шуңа туралган кәбестә, петрушка һәм 2 йомырка кушып тугланган 0,5 л сөтне салып, кайнатып чыгарыгыз. Кайнар аш өстенә вак угычта уылган сыр (100 г) сибеп болгатыгыз.
Сарымсак ашы
Шакмаклап туралган (200 г) бәрәңгене әнис белән бергә пешерегез. Шуңа вак итеп туралган 4 теш сарымсак, төелгән кара һәм кызыл борыч, тоз, атланмай, бераз сөт өстәп, барысын бергә кайнатыгыз. Өстенә яшел тәмләткечләр сибеп, кыздырылган ипи шакмаклары белән табынга куегыз.
Бәрәңгеле солы ашы
Иң элек шакмаклап туралган (250 г) бәрәңгене пешереп алыгыз. Аннан соң шул бәрәңгегә (200 г) изелгән солы ярмасы, тоз салып, әзер булганчы кайнатыгыз. Сөт, атланмай, туралган яшел тәмләткечләр өстәп янә дә кайнатып чыгарыгыз.
"Геркулес” ашы
Геркулесны (1 стакан) 2 л суга салып томалап пешерегез. Шуңа 2 аш кашыгы атланмай, кирәгенчә тоз кушып, каймак куелыгына җиткәнче кайнатыгыз.
Төшсез кара җимешне (200 г) аерым савытта пешерегез дә изгәләп ашка салыгыз. Ашны кыздырылган ипи шакмаклары белән табынга куегыз.
Тавык ашы
Тавыкны пешереп, ак итен аерып алыгыз. Калган итне иттарткычтан чыгарып шулпага салыгыз. Шуңа йомырка сарысы салып тугланган 1 стакан сөт кушыгыз. Кирәгенчә тоз өстәп, барысын бергә кайнатып чыгарыгыз. Тәлинкәдәге туралган ит һәм кыздырылган ипи шакмаклары өстенә кайнар аш бүлеп салыгыз.
Комментарий юк