Тефлонмы, керамикамы? Таба сайлыйбыз

Яхшы, матур савыт-саба һәр хатын-кызның хыялыдыр инде ул. Кибеткә керсәң, табаларның нинди генә төре юк та, нинди генә төсе юк. Безгә аның матуры гына түгел, сыйфатлысы, чыдамлысы да кирәк. Кайсысын сайласак, оттырмабыз: тефлонлысынмы, керамикалысынмы?

Тефлон

Тефлон ул – сәүдә маркасы. Ә табаны каплаган полимер үзе политетрафторэтилен дип атала. Фтор һәм углерод атомнарының кушылмасы тефлонны башка төр матдәләр белән реакциягә керүдән саклый. Шуңа да тефлон табада әзерләнгән ризыкка бернинди ят тәм сеңми.

Тефлон табалар 260 градуска кадәр кыздырганга чыдый. Тефлон – сыгылмалы материал, тиз генә купшакланмый.

Шома булганга, тефлон табада кыздырганда ризык таба төбенә ябышмый. Шуңа күрә мондый табада ризык әзерләгәндә күп май тотылмый. Майны гомумән табага агызырга кирәкми, ә майга манылган силикон пумала белән таба төбен ышкып кына алу да җитә.

Тефлон гадәттә кермик табалардан арзанрак тора. Куллану вакыты төрлечә. Тефлон катламы калынрак һәм күзәнәклерәк булган саен, озаккарак чыдый – 10 еллап хезмәт итә. Арзанлы экземплярларның гомере – 2-3 ел гына.

Тефлон табаны буш көе кыздырырга ярамый. Әгәр таба 260 градустан артыграк кыза икән, аны чыгарып атарга гына туры киләчәк.

Тефлон таба тиз кырыла. Кырылган таба ризыкны ябыштыра башлый. Тефлон өслеге нык кырылса, аны кулланмавың яхшырак.

Керамика

Керамик савыт-сабаның үзлеге утка чыдам пыяла савытларга охшаш. Ул хәтта 400 градус кайнарлыкка да чыдый.

Керамик таба кырылу-тырналуларга тиз бирешми. Бер-ике тапкыр тимер кашык белән кагылганнан гына аңа берни дә булмый. Керамик таба тиз юыла да.

Керамик табада кыздырганда ризыкка бернинди дә ят тәм сеңми, андый табада калган ризык үзе дә тиз генә бозылмый.

Керамик таба иң экологик савыт санала.

Керамика температураның кинәт үзгәрүенә бик сизгер. Әйтик, кызган табага салкын әйбер салсагыз, керамик җирлектә вак кына ярыклар барлыкка килә. Тора-бара ул ярыклар зураеп, табаның сыйфаты китә.

Бу мөһим:

Ризыкны көйдерми торган савыт-сабаларны берсе эченә икенчесен тыгып сакларга ярамый. Болай эшләсәң, аның өслеге кырыла. Шулай саклау уңыйлырак булса, ике арага силикон аслык куеп калдырыгыз.

Табалар сайлаганда аның авырлыгына игътибар итегез. Авыр савыт-саба сыйфатлы була, андыйда ризык әзерләве дә уңайлырак.

Штампланган табаларга караганда, алюминий яки корычтан коелган (литая) табалар чыдамрак.

Фото: https://pixabay.com/