Тагын кайгылы хәбәр

Татар сәнгате зур югалту кичерә... Бүген 76 нчы яшендә атаклы музыкант, җырлар авторы, легендар җырчы Илһам Шакировның легендар баянчысы Рамил Курамшин вафат... 

Татарстанның халык артисты, виртуоз музыкант, татарның данлыклы баянчысы Рамил Курамшин зыялы, якты, затлы кеше иде. Татар җыр сәнгатенә зур өлеш керткән олы шәхес. Әле җәй көне, июнь аенда гына аның 75 яшьлек юбилеен билгеләп үткән идек. Аның турында бик матур хатирәләр саклана.
Түбән Новгород өлкәсенең Кызыл Октябрь районында укытучылар гаиләсендә туган Рамил абый күпләр өчен зыялылык, эрудициялелек эталоны иде. Талантлы егет мәктәптән соң 1964 елда Казан дәүләт педагогика институтының музыка факультетына укырга керә, профессиональ баянчы булу теләге аны Казан музыка училищесына алып килә. Студент елларында ук татар халык көйләрен баян өчен эшкәртә, музыкаль пьесалар яза. Ул 20 ел дәвамында атаклы Илһам Шакировның алыштыргысыз баянчысы була. Әлфия Авзалова, Фәхри Насретдинов, Зифа Басыйрова, Габдулла Рәхимкулов, Вафирә Гыйззәтуллиналар белән гастрольләрдә йөри. Ул шәп баянчы, композитор гына түгел, шәп җырчы да иде әле! «Карурман»нарны бөтен бормалары белән башкарган егетне Илһам Шакиров үзе сәхнәгә җырларга чыгара торган була! Милләт өчен армый-талмый хезмәт итүче, күп укый, бар яңалыклардан хәбәрдар Рамил абый редакцияләрнең дә үз кешесе иде. Аны «аяклы энциклопедия» дип йөртәләр иде! 
Соңгы вакытта каты авыру белән көрәште. Инфаркт, инсульт кичерде. Үзе артык тыйнак булды. «Олпатлар янәшәсендә кем инде мин? Үлеп китсәм, сизмәсләр дә кебек...» дигән сүзләре искә төшә дә, йөрәк елый...
Рамил абый, сине югалту хәбәре һәр татар кешесе өчен яшен суккандай булды. Татар җыр сәнгате ятим калды. Җырларың-моңнарың өчен, якты күңелең, изгелекләрең өчен рәхмәт сиңа, Рамил абый! Урының җәннәттә булсын!