“Һөнәр” VII Бөтенроссия яшь режиссура фестивален уздыру көннәре тәгаенләнде

Быел “Һөнәр” VII Бөтенроссия яшь режиссура фестивале 7-13 декабрьдә Казанда уздырылачак.

Фестиваль кысаларында беренче тапкыр “Беренче” (“Первый”) заман драматургиясе һәм режиссурасы үзәгенең дә спектакль эскизлары тәкъдим ителер дип көтелә.

Фестиваль яшь режиссерларга үзләрен күрсәтү мөмкинлеге бирә. Чарада 35 яшькә кадәр булган режиссерларның спектакльләре яки, ул яшьне узган булса, режиссерның дебют эшеннән соң 5 ел эчендә сәхнәләштерелгән спектакльләре катнашырга хокуклы. Тамашачылар игътибарына соңгы 2 театраль сезонда куелган спектакльләр, премьералар тәкъдим ителә.

VII фестивальнең географиясе Казаннан тыш, Яр Чаллы, Түбән Кама, Бөгелмә, Санкт-Петербург, Уфа, Ижевск шәһәрләрен колачлый. “Һөнәр” программасына татар, рус, башкорт, мари һәм удмурт телләрендә 18 спектакль кертелгән. Аларны 7 театраль мәйданда тамаша кылырга мөмкин булачак: Г.Камал исемендәге Татар дәүләт академия театрында, К.Тинчурин исемендәге Татар дәүләт драма һәм комедия театрында, “Әкият” Татар дәүләт курчак театрында, Г. Кариев исемендәге Казан Татар дәүләт яшь тамашачылар театрында, Казан дәүләт Рус яшь тамашачылар театрында, М.Сәлимҗанов исемендәге актерлар йортында, “Угол” иҗат лабораториясендә.

Һәр спектакльдән соң фестивальнең тәнкыйтьчеләр коллегиясе, журналистлар, спектакльнең иҗат төркеме һ.б. катнашында фикер алышу үтәчәк, диелә Г. Камал театры матбугат хезмәте хәбәрендә.

Искәртеп үтәбез: I “Һөнәр” фестивале 2009 елның декабрендә Казанда Г.Камал театры инциативасы һәм Татарстан Республикасының мәдәният министрлыгы ярдәме белән уздырылган иде. Беренче фестивальдә 6 яшь режиссер катнашты. Шул елдан башлап, һәр декабрь саен Татарстанның яшь режиссерлары үз эшләрен “Һөнәр”дә тәкъдим итә. Фестиваль ТР Мәдәният министрлыгы, ТР Театр әһелләре берлеге, Г.Камал исемендәге татар дәүләт академия театры тарафыннан оештырыла.

сылтама: http://tat.tatar-inform.ru/news/2015/11/05/115249/

Следите за самым важным и интересным в Telegram-каналеТатмедиа