«Манеж»да ветераннарның портретлары күрсәтелә

«Казан Кремле» музей-тыюлыгындагы «Манеж» күргәзмәләр залында Фәрит Гобәевнең «Бөек Җиңүнең 70 портреты» дигән фотокүргәзмәсе ачыла. Экспозиция Бөек Ватан сугышы ветераннарының фотоларын үз эченә ала.

Фотопроект кысаларында автор Татарстанның барлык районнарында булган. «Һәр фотосурәт – әлеге гаҗәеп кешеләрнең якты истәлеген саклау өчен тагын бер мөмкинлек! Өч ай эчендә гаять зур эш башкарылды» - ди Фәрит Гобәев. Экспозициядә шулай ук күргәзмә геройларының гаилә архивыннан алынган уникаль фотолар белән дә танышырга мөмкин.

Фотограф проект форматына гына сыеша алмаган: алдан планлаштырганча, портретлар 70 кенә түгел, ә 150гә үк җиткән. Шунлыктан, «Манеж»дагы күргәзмәдән тыш, «Җиңү. Барыбызга да берәү» дигән фотоальбом нәшер ителәчәк. Анда Бөек Ватан сугышы ветераннары һәм тыл хезмәтчәннәренең барлык фотолары урын алыр дип көтелә.

Проект «Бердәм Россия» партиясенең Татарстан төбәк бүлеге ярдәмендә гамәлгә ашырыла.

«Бөек Җиңүнең 70 портреты» фотокүргәзмәсе ачылу уңаеннан күргәзмәгә килүчеләр игътибарына Халыкара конкурслар лауреаты, «Музыка – әйләнә-тирәбездә» Халыкара яшьләр классик музыка фестиваленең сәнгать җитәкчесе Данияр Соколовның концерты тәкъдим ителде.

Сылтама: http://intertat.ru/tt/society-tt/item/44008-%E2%80%9Cmanezh%E2%80%9Dda-veterannarnyi%D2%A3-portretlaryin-k%D2%AFrs%D3%99t%D3%99ch%D3%99kl%D3%99r.html