Республикабыз мәркәзе Универсиада һәм Су спорты төрләре Дөнья чемпионты кебек зур спорт ярышлары белән генә данлыклы түгел. Россиянең спорт башкаласы исемен горур тотуда Казан марафонының да өлеше бар.
21 май көнне башкалабызда инде өченче тапкыр Казан марафоны узачак. 2015 елда бу спорт чарасында 2600 кеше катнашкан, 2016 да – 8900 кеше. Быел оештыруычылар, марафонда катнашучылар саны тагын да артыр, дип ышаналар.
Катнашу өчен Казан марафоны сайтында теркәлү күптән ачык. Һәм быел катнашучылар арасында медиа-шәхесләр дә байтак. Мәсәлән, марафон илчеләре арасында – Гөлназ Сәфәрова һәм Эльмира Кәлимуллина.
Гөлназ Сәфәрова – Татарстан Республикасының атказанган артисты, теле-радиотапшыруларны алып баручы, сценарийлар авторы, режиссер:
«Мин спорт белән бәйле чараларны бик яратам. Ә инде республика күләмендә дәрәҗәле спорт бәйгесе булган Казан марафонында катнашырга икеләтә шатмын. Бу марафон барлык республиканы һәм аның кунакларын берләштереп, ел саен үткәрелә торган яхшы традициягә әйләнер дип ышанам. Сез дә кушылыгыз, бергә йөгерик!»
Эльмира Кәлимуллина – Татарстан Республикасының атказанган артисты, «Голос» телевизион бәйгесе финалисты:
“Менә инде икенче ел миңа Казан марафоны илчесе булу мөмкинлеге тәтеде. Казан марафоны – республика башкаласының борынгы тарихлы һәм бай мәдәниятле шәһәр булуы белән бергә зур спорт мәркәзе икәнлеген дөньяга дәлилләп торучы чара».
Комментарий юк