Кытайлар кешенең ашказанын чынлап та бер казан дип күзаллап, ул гел акрын гына кайнап торырга тиеш, диләр. Кышын казанны кайнатыр өчен «гайрәтлерәк утыннар» кирәк, шуңа да итле, майлы ризыкларны күбрәк кулланалар. Җәен исә «утны» киметү тиешле — яшелчә, җиләк-җимеш ише җиңел ризыкларга күчү мәслихәт. Тик менә күп кеше яшелчәне өнәп бетерми. Аларның, мөгаен, яшелчәдән әзерләгән шашлык ашап караганнары юктыр.
Пешереп карагыз әле!
Кирәк:
* 1 ташкабак;
* 1-2 баклажан;
* 4-5 помидор;
* төрле төстәге болгар борычы;
* 200-250 г адыгей сыры;
* тоз-борыч;
* аштәмләткеч үләннәр;
* үсемлек мае;
* агач таякчыклар.
Камыр өчен:
* 150 мл кефир;
* 150 мл су;
* 200 г чамасы он;
* тәменчә тоз, борыч.
Эш барышы:
Ташкабак белән баклажанның кабыгын чистартабыз. Помидордан кала, барлык яшелчәләрне дә эрерәк шакмакларга турыйбыз һәм тоз-борыч, аштәмләткечләрне салып, ярты сәгать маринадлыйбыз.
Помидор белән сырны да шундый ук шакмакларга турыйбыз.
Кефир, су һәм оннан каймак куелыгында камыр ясыйбыз (бик сыек булмасын, югыйсә табага салганчы ук агып бетәр). Тоз, борыч сибәбез.
Яшелчәләрне һәм сырны агач таякчыкларга аралаштырып тезәбез.
Таякчыкка тезелгән яшелчәләрне камырга манып алабыз. Савытыгыз таррак булса, камырны кашык белән өстән коярга да була.
һәр ягы да кызарганчы майлы табада әйләндерә-әйләндерә кыздырабыз. Табага майны бик күп салмагыз, 2 см чамасы булса, шул җитә.
Әзер шашлыкны артык маеннан арындыру өчен кәгазь тастымалга куеп торабыз һәм тәлинкәгә матурлап тезеп, кайнар килеш табынга чыгарабыз. Янына сарымсаклы каймак бирергә мөмкин.
Итсез ризыкны өнәмәүчеләр яшелчә янына пешкән тавык ите яки казылык та өсти ала.
Комментарий юк