Кобидо – матурлык сагында

Кобидо – япон чибәркәйләренә йөзләренең яшьлеген һәм матурлыгын сакларга ярдәм иткән борынгы мануаль алым. Әлеге техника турында беренче тапкыр 1472 елда ук язганнар. Европага бу массаж төре ХХ гасырда гына керә һәм шунда ук популярлаша. Кобидо япон теленнән «матурлыкны саклау юлы» дип тәрҗемә ителә. Һәм ул, чынлап та, битнең яшьлеген саклап калу өчен иң нәтиҗәле ысул булып тора. Бу массажны ясаганннан соң тире күзәнәкләренең тернәкләнү функциясе яхшырак эшли башлый. Йөз, муен, баш мускуллары киеренкелектән чыгып, кан йөреше яхшыра. Кобидо массажын матурлык белгечебез Ләйсән САБИТОВА өйрәтә. Аны майны күп кулланып ясау мөһим. 

• Гадәтәгечә, массажны күкрәк өслеген әкренләп каккалаудан, уртадан күкрәк читенә таба бармаклар белән «тырмалаудан» башлыйбыз. Бу лимфа йөрешен уятып җибәрер өчен кирәк.

• Баш бармак нигезе белән муенның кырыйларын, артын астан өскә таба ышкыйбыз. Калкансыман биз урнашкан җиргә тимәгез.

• Ике кулның да имән һәм урта бармакларын ыргак кебек бөклибез, иякне эләктерәбез һәм капма-каршы якка, ягъни колакларга таба хәрәкәт иттерәбез. 

• Имән һәм урта бармаклардан кайчы ясап, өске һәм аскы иреннәр кырыена куябыз да елмаю рәсеме ясыйбыз.

• Ике як чигәгә перпендикуляр итеп имән бармакларны куябыз һәм баш бармаклар белән бит алмаларын массажлыйбыз.

• Борын читләрен, кырыйларын урта бармак очлары белән  ышкыйбыз.

• Каш арасындагы җыерчыкларны бетерәбез. Моның өчен чәч үскән җиргә  параллель итеп имән бармакларны куябыз да баш бармаклар белән ике каш арасын өскә таба тиз-тиз сыпырабыз. 

• Имән бармакларны кара-каршы китереп, маңгайны ышкыйбыз.

• Бит йөзен бармаклар белән чеметкәләп чыгабыз, аны тарттыру өчен  йөзнең тирә-ягын колакка, чәч үскән урынга таба массажлыйбыз. 

 Фото һәм видео: Анна Арахамия.