​Студентлар отрядлары бүген дә популяр! / Яңалыклар / Сөембикә
Хатын-кызлар өчен татар телендә
бердәнбер әдәби-нәфис журнал
1913 елда чыга башлады
1926–1991 елларда «Азат хатын»
Баш битЯңалыклар → ​Студентлар отрядлары бүген дә популяр!

​Студентлар отрядлары бүген дә популяр!

09 ноября 2017
1735 карау
Татарстан студентларының төзелеш отрядларына багышланган һәйкәл яки стела макетына һәм проектына конкурс игълан ителә.

Студентларның төзелеш отрядлары. Бу сүзләргә никадәр романтика, оптимизм, яшьлек, матурлык сыйган! Узган гасырның 60 нчы, 70 нче, 80 нче елларында бик популяр булган бу хәрәкәт йөз меңнәрне берләштерә иде үзенә! КамАЗ, Түбән Кама нефтехимы, Зәй ГРЭСы, «Оргсинтез», «Теплоконтроль», Компрессорлар заводы – студентлар төзелеш отрядларының елъязмасын әнә шундый колачлы төзелешләр бизи. Ә Татарстан студентларының төзелеш отрядлары биографиясе 1963 елдан башлана. 2018 елда студентларның хезмәт отрядлары оешуга 55 ел була. Шушы вакыйга уңаеннан ТР Яшьләр эшләре һәм спорт министрлыгы, Төзелеш, архитектура һәм торак-коммуналь хуҗалык министрлыгы, студентларның хезмәт отрядлары республика үзәге Татарстан студентларының төзелеш отрядларына багышланган һәйкәл яки стела макетына һәм проектына конкурс игълан иттеләр. Конкурс эшләре быелның 1 ноябреннән 2018 елның 1 февраленә кадәр кабул ителә. Әлеге бәйгедә рәссамнар, архитекторлар, дизайнерлар, шулай ук студентлар һәм аспирантлар катнаша ала. Һәйкәл Декабристлар урамында, «Яшьләр үзәге» янындагы скверда калкачак. Аның урыны очраклы гына сайланмаган – Яшьләр үзәге бинасы 1977 елда ВЛКСМның Татарстан өлкә комитеты акчасына төзелгән, анда студентларның төзелеш отрядларының да өлеше зур. Яшьләрнең тырыш хезмәтен зурлап салынган һәйкәлләр Мәскәүдә, Воронеж өлкәсендә, Магнитогорскида, Белгородта, Томскида, Екатеринбургта, Түбән Новгордта, Якутскида калыкты инде.

Бүгенге студентлар да төзелеш отрядларының данлы традицияләрен дәвам итә. Казан, Чаллы, Алабуга, Түбән Кама, Әлмәт, Чистай студентларының күркәм эшләре турында иркенләп сөйләп булыр иде. Татарстандагы әлеге популяр хезмәт отрядлары төзелеш, транспорт, сервис, мәгариф тармакларында хезмәт куя. Республика, федераль, халыкара программаларны һәм проектларны тормышка ашыруда студентларның хезмәт отрядлары хәрәкәте һәрчак дәүләтнең лаеклы партнеры булды. Ел саен 10 меңнән артык студент Татарстанда социаль өстенлекле, стратегик мөһим проектларны тормышка ашыруда катнаша. Алар мәктәпләр, хастаханәләр, балалар бакчалары, торак йортлар, производство объектлары, спорт корылмалары сала, урман фондын тәртипкә китерә, агросәнәгать комплексында, энергетика, транспорт, сәламәтлек саклау тармакларында эшли. Төзелеш отрядларында – иң уңган, иң тырыш, иң булдыклы студентлар. 

Эльмира ЗАКИРОВА    

Сезнең фикер

Загрузка..
Загрузка..
Казан шәһәре Совет районы буенча Россия Пенсия фонды идарәсенең матбугат чаралары белән элемтәләр урнаштыру бүлеге белгече
ТР кеше хокуклары буенча вәкаләтле вәкил
Кукмара районы Камышлы авылы имам-хатыйбы
Татарстан Республикасының Этил спирты һәм алкогольле продукция җитештерүне, әйләнештә йөртүне, сыйфатын дәүләт тикшерүен тәэмин итү һәм кулланучылар хокукларын яклау буенча дәүләт инспекциясенең Казан бүлеге җитәкчесе.
Врач-кардиолог, терапевт, кандидат медицинских наук
Intertat
Татар-информ
Татмедиа
16+
Сделано в iCC Design Group
www.icc-otk.com