Хатын-кызлар өчен татар телендә
бердәнбер әдәби-нәфис журнал
1913 елда чыга башлады
1926–1991 елларда «Азат хатын»
Баш битМәдәниятРәссам сәхифәсе → Аккош булып кара!

Аккош булып кара!

05 июля 2014
2198 карау
Гөлнарита... Мин аның шушындый сирәк исеменнән үк гадәти кеше түгеллеген аңларга тиеш идем дә бит. Ул үзе дә, моннан биш-алты ел элек танышканда, иҗат кешесе икәнен яшерә белде. Хәер, ут чәчеп торган җирән чәч көлтәсе, беркемдә дә булмаган ачык төстәге киемнәре, һәрвакыт шат кәефе белән дә истә кала торган кеше ул үзе.

Киемнәр коллекцияләреннән һәм картиналардан торган иҗатын яшерүе заманның кырыс таләпләренә буйсынып, акча эшләүче станок битлеге кию булган икән. Яшерү дә түгел, үз-үзеннән качуы, дисәк, дөресрәк булыр. Янәсе: «Мә, Замана! Каләмнәремне, пумаламны, киндер, мольберт, буяуларны һәм Уфа сәнгать училищесы дипломын бер тартмага тутырып, чормага менгереп куйдым. Бүгеннән мин синеке!» Һәм замана Гөлнарита Камалованың ун елга якын гомерен урлаган, алмашка исә ни мәһабәт сарай бирмәгән, ни затлы машина, банкта сукыр тиен дә ятмый, ичмасам! Ишегалдындагы чит ил машинасының кредиты да күптән түгел генә түләнеп беткән. Кыскасы, замана белән бәхәстә оттырды ул.

...Оттырмады ла! Үзе булып калу хокукы алды түгелме соң? Тәҗрибә, ирек хисе – менә шундый бүләк китерде аңа язмыш. Якын дуслары туган көненә алып килгән киндер-буяулар һәм «язарга тиеш!» дигән теләкләре Гөлнаританың тормышын астын-өскә китереп ташлый Бүләккә алып килгән киндергә беренче булып «Нәсел агачы» дигән триптихның штрихлары төшә...Гөлнаританың еллар буе бикләнеп яткан иҗат куәсе чишмә кебек бәреп чыга. Хатын-кызга әйтер сүзе күп аның. «Тормышта хатын-кыз булып кала алу – бәхет», – ди ул. Журнал укучыларыбызга тәкъдим ителгән цикл да татар кызларына багышлана.

«Хатын-кыз кулында дөнья чәчәккә әверелә. Ул үзе дә шул чәчәкнең берсе»; «Кыз бала әти-әнисе янында пар канат астында алтын сарайдагы кебек кадерләнеп кенә үсә дә, аккош кебек, очып китә»; «Хатын-кыз – серле дөнья, аның күз карашыннан дөньялар үзгәрә».

Гөлнарита хатын-кызларның образларын бихисап тудыра ала кебек. Аныңча, Сөембикә ханбикә үзе күзаллаган хатын-кыз үрнәге булырга тиеш. Сөембикәнең дөньясы саф, чиста, баш очында – аяз күк. Ул укымышлы, затлы, зыялы. Ул матур, аның куллары бик нәфис. Ул башына ак өрфия япкан, затлы бизәнү әйберләре таккан. Ул серле, карашында бөек вәкарьлек.

Шәмәхә төсләр өстенлек иткән аның бу акварель эшләре әле тәмамланмаган циклдан. Татар кызларының борынгыдан килә торган күркәм сыйфатлары Уфа кызының каләменнән төрле образларга төренеп тама тора. Милли үзаң Гөлнаританы җиде төн уртасында уятып, кулына кылкаләм алырга мәҗбүр итә икән, монда бер хикмәт бардыр. Кайтуың белән, Гөлнарита! Иҗатына ак юл синең!

 

Сезнең фикер

Загрузка..
Загрузка..
ТР кеше хокуклары буенча вәкаләтле вәкил
Россия Федерациясе Пенсия фондының Казан шәһәре Совет районы буенча матбугат чаралары белән элемтәләр урнаштыру бүлеге баш белгече
Кукмара районы Камышлы авылы имам-хатыйбы
Татарстан Республикасының Этил спирты һәм алкогольле продукция җитештерүне, әйләнештә йөртүне, сыйфатын дәүләт тикшерүен тәэмин итү һәм кулланучылар хокукларын яклау буенча дәүләт инспекциясенең Казан бүлеге җитәкчесе.
Врач-кардиолог, терапевт, кандидат медицинских наук
Intertat
Татар-информ
Татмедиа
16+
Сделано в iCC Design Group
www.icc-otk.com
Orgy