Хатын-кызлар өчен татар телендә
бердәнбер әдәби-нәфис журнал
1913 елда чыга башлады
1926–1991 елларда «Азат хатын»
Баш битКөн тәртибендә → Түземсезлек белән көткән фильм

Түземсезлек белән көткән фильм

Эльмира Закирова
Эльмира Закирова
08 апреля 2015
2044 карау
Габдрахман Әпсәләмовның «Ак чәчәкләр» романы буенча ТНВ каналында күпсерияле фильм төшерелә башлау хәбәре күпләр өчен сөенечле вакыйга булган иде инде. 60 нчы елларда миллионнарның яраткан әсәре иде бит ул! Быел бу популяр романның язылуына инде 50 ел тула. Шул арада аны кайсы гына телләрдә укып хозурланмадылар! Гөлшәһидә, Мансурлар укучыларның идеалына әйләнде.


Врачларны иң изге кешеләр итеп кабул иттеләр... Һәм менә Татар дәүләт филармониясендә «Ак чәчәкләр»не тәкъдим итү көне! Кичке 6 га дип тәгаенләнгән кичәгә билетларның шундук сатылып бетүе, билет сорап килүчеләрнең күплеге оештыручыларны да аптырашта калдыра. Халык соравы буенча, тәкъдим итү бәйрәмен өстәмә рәвештә көндезгә куялар. Филармония тирәсе гөжләп торды. Артык билет сораучылар да шактый иде... Ә бәхетлеләр – алма төшәр урын да калмаган тамаша залында! Дулкынланып, фильмда уйнаган артисларны сәламлиләр. Аларны республиканың барлык театрларыннан да сайлап алганнар. Гөлшәһидә ролендә, мәсәлән, К. Тинчурин театры артисткасы Резеда Сәлахова, Мансурны Әлмәт театры артисты Динар Хөснетдинов. Камал театры артистлары Әзһәр Шакиров, Наил Дунаев, Хәлимә Искәндәровалар, җырчы Хәния Фәрхи... Барысы да фильмда уйный! Тамашачыга «Ак чәчәкләр»нең узган көздә төшерелгән 2 нче сериясен күрсәттеләр. Беренче серия май аенда – алмагачлар чәчәк атканда төшереләчәк икән. Ун сериядән торачак фильм көзгә тамашачыларын шатландырыр дип өметләнәләр. Кайбер серияләр Халыкара мөселман киносы фестивалендә дә күрсәтеләчәк.

Мондый форматтагы тәкъдим итү кичәсе татар мәдәнияте өчен дә яңалык итеп кабул ителде. Фильмны карау, «Ак чәчәкләр» өчен махсус язылган җырларны популяр артистлар башкару (Филүс Каһиров, Вил Усманов, Хәния Фәрхи, Зәринә Хәсәншина, «Казан егетләре» һ. б.) Флера Сөләйманованың «Гөлшаһидә җыры» исә җаннарны кабат айкады. Алкышлар астында сәхнәгә фильмның продюсеры Миләүшә Айтуганова, режиссеры Ренат Әюпов, режиссер ярдәмчесе, төшерүче Алмаз Нургалиев, сценарий авторы Айгөл Әхмәтгалиевалар күтәрелде. Халык шулкадәр сусаган мондый ихлас аралашуга: залдан сорау бирүчеләр, фикер әйтүчеләр, теләк-киңәшләрен җиткерүчеләр дә шактый иде. Алкышлар, күз яшьләре, хатирәләр, җырлар, ярату һәм соклану, чиксез рәхмәт хисләре – бар да сыйган иде бу тәкъдим итү бәйрәменә.   

 



Сезнең фикер

Загрузка..
Загрузка..
Казан шәһәре Совет районы буенча Россия Пенсия фонды идарәсенең матбугат чаралары белән элемтәләр урнаштыру бүлеге белгече
ТР кеше хокуклары буенча вәкаләтле вәкил
Кукмара районы Камышлы авылы имам-хатыйбы
Татарстан Республикасының Этил спирты һәм алкогольле продукция җитештерүне, әйләнештә йөртүне, сыйфатын дәүләт тикшерүен тәэмин итү һәм кулланучылар хокукларын яклау буенча дәүләт инспекциясенең Казан бүлеге җитәкчесе.
Врач-кардиолог, терапевт, кандидат медицинских наук
Intertat
Татар-информ
Татмедиа
16+
Сделано в iCC Design Group
www.icc-otk.com