Хатын-кызлар өчен татар телендә
бердәнбер әдәби-нәфис журнал
1913 елда чыга башлады
1926–1991 елларда «Азат хатын»
Баш битКөн тәртибендә → Рамазан ае башлану уңаеннан, Татарстан мөфтие Камил хәзрәт Сәмигуллин мөрәҗәгать итә

Рамазан ае башлану уңаеннан, Татарстан мөфтие Камил хәзрәт Сәмигуллин мөрәҗәгать итә

06 июня 2016
689 карау
Рамазан ае башлану уңаеннан, ТР мөселманнары Диния нәзарәте рәисе, мөфти Камил хәзрәт Сәмигуллин мөрәҗәгать итә.

“Бисмилләәһир-рахмәәнир-рахииим.
Әссәләәмү галәйкүм үә рахмәтүллаһи үә бәракәәтүһ!

Мөхтәрәм дин кардәшләребез! Татарстан Республикасы мөселманнары Диния нәзарәте һәм шәхсән үз исемемнән изге рамазан ае башлану белән ихластан котлыйм!
2016 елда рамазан ае, Аллаһ боерса, 5 июньдә кояш баеганнан соң башлана. Бу кичтә Татарстан мәчетләрендә 20 рәкәгатьле беренче тәравих намазлары укылачак. 6 июньдә исә таң ату белән мөселман кардәшләребез Аллаһы Тәгаләбез фарыз иткәннәрне үтәп һәм Сөекле Пәйгамбәребез Мөхәммәд саллаллаһу галәйһи вә сәлләм үрнәгендә уразага керәләр.

Исламда һәр мөселман өчен фарыз, ягъни үтәргә тиешле булган биш гамәл бар: шәһадәт, ураза, намаз, зәкят һәм хаҗ. Изге рамазан ае барча мөселманнарга шул тиешле гамәлләрнең берсен үтәргә – ураза тотарга мөмкинлек бирә. Без уразаны Раббыбыз ризалыгы өчен дип тотабыз. Аллаһы Тәгалә Коръәни Кәримнең «Әл-Бәкара» сүрәсе, 183 нче аятендә: «Әй, иман китергән бәндәләр, сездән элекке кавемнәргә фарыз булган шикелле, сезгә дә ураза фарыз булды», – дип, уразаның фарызлыгын белдерде.

Аллаһы Тәгалә рамазан аенда безгә туры юл күрсәтүче Коръәни-Кәримне иңдергән. Бу айдагы Кадер кичәсенең кыйммәте мең айдан да зуррак. Нәкъ менә шул кичәдә Изге Коръәннең беренче аятьләре иңдерелгән. Кадер кичәсендә кылган изге гамәлләребезнең әҗер-саваплары зурдан, кылган догаларыбыз кабуллардан була. Рамазанда фәрештәләр ураза тотучыларның гөнаһларын кичерүне сорап торуларын да онытмаска кирәк.

Раббыбыз ураза тотарга һәм гөнаһлы эшләрдән тыелырга, күңелләребезгә миһербан биреп, изге гамәлләр кылырга ярдәм итсен иде. Олы җанлылык күрсәтергә, мохтаҗларга, ятимнәргә, инвалидларга, ялгыз картларга ярдәм кулы сузарга насыйп булсын. Рамазан аенда эшләгән изгелеккә савап 10нан алып 700гә кадәр мәртәбә артыграк. Пәйгамбәребездән килеп ирешкән көдси хәдистә Аллаһы Тәгалә әйтә: «Ураза гыйбадәте – Минем ризалыгым өчен. Аның әҗерен Үзем бирермен».
Әлеге изге айны барыбызга гыйбадәттә уздырырга язсын, төннәрне Аллаһка зикер кылып, Коръән укып һәм якыннарыбызны сөендереп үткәрик. Аллаһы Сөбханәһү вә Тәгалә барыбызга да көч һәм сабырлык бирсен! Тоткан уразаларыбызны, кылган изге гамәл-гыйбадәтләребезне, догаларыбызны, укыган тәравих намазларыбызны кабуллардан кылса иде. Амин!

Ихтирам һәм изге догалар белән,
Үзәкләшкән дини оешма – Татарстан Республикасы мөселманнары Диния нәзарәте рәисе, мөфти Камил хәзрәт Сәмигуллин”.


сылтама

Сезнең фикер

Загрузка..
Загрузка..
ТР кеше хокуклары буенча вәкаләтле вәкил
Матбугат чаралары белән элемтәләр урнаштыру булеге белгече
Кукмара районы Камышлы авылы имам-хатыйбы
Татарстан Республикасының Этил спирты һәм алкогольле продукция җитештерүне, әйләнештә йөртүне, сыйфатын дәүләт тикшерүен тәэмин итү һәм кулланучылар хокукларын яклау буенча дәүләт инспекциясенең Казан бүлеге җитәкчесе.
Врач-кардиолог, терапевт, кандидат медицинских наук
Intertat
Татар-информ
Татмедиа
16+
Сделано в iCC Design Group
www.icc-otk.com