Хатын-кызлар өчен татар телендә
бердәнбер әдәби-нәфис журнал
1913 елда чыга башлады
1926–1991 елларда «Азат хатын»
Баш битХатын-кыз галәмеКулларыңнан куан → ​Ташларны бизәр чак


​Ташларны бизәр чак

Алинә БАССАРИЕВА
Алинә БАССАРИЕВА
27 ноября 2017
477 карау
Яр буеннан матур ташлар җыю гадәте күп кешедә бардыр ул. Менә монысын гына, менә анысы бигрәк шома инде, бусының төсе кызык икән... дип, берәм-берәм җыя торгач, ялдан әйләнеп кайтканчы ташлар хәзинәсе шактый гына баеган була. Җәйге ялыгыз­ның күңелле хатирәсе булган ул ташлардан бик матур картиналар ясарга мөмкин. Картина­га ук тотынмыйча, бизәп, үтә күренмәле вазага гына тутырсагыз да
матур булачак. Ә бу эшкә безне Алинә БАССАРИЕВА өйрәтәчәк.
 

Кирәк: 

* түгәрәк һәм җәлпәк диңгез ташлары (озынлыгы якынча – 5-6 см, иңе – 4 см);
* төрле төстәге акрил буяулар. Акрил урынына, гуашь та ярый. Әмма акрил белән буялган ташлар матуррак;
* нечкә генә кылкаләм;
* төссез лак.
 

Эш барышы:

1. Эшкә керешкәнче, ташларны җылы суда сабынлап юып, киптерәләр. 

2. Бизәр өчен тавык йомыркасы зурлыгындагы җәлпәк, шома ташлар кулай. 

3. Вак-вак тишекле ташларны ПВА җилеме белән каплап, җирлек әзер­ләргә кирәк. Кытыршы урыннарын наждак кәгазе белән ышкып шомарталар.

4. Ташка бизәк төшерү ысуллары күп төрле. Без, мәсәлән, акрил буяулар белән ябалаклар ясадык. Бериш ташларны тулысынча буяп, рәсемне төсле җирлеккә ясасак, беришләрен буямыйча, үз төсендә калдырдык.  

5. Ташларны тулысынча буяу өчен губка куллансаң яхшырак. Кылка­ләм­нән буй-буй эз калырга мөмкин. Губка исә эз калдырмый. 

6. Төрле түгәрәкләр, кыяр бизәкләр, шакмаклар, боҗралар белән бизәлгән ташлар да бик матур. 

7. Икенче бер киң таралган ысул: декупаж ысулы. Бу ысул кулына кылка­ләм тотып карамаган кеше өчен дә отышлы. Кәгазь салфеткадан үзегезгә ошаган бизәкне кисеп аласыз да (күп катлы салфетканы катларга аерып, рәсемлесен генә кулланасы), шул ук ПВА җилеме ярдәмен­дә ташка ябыштырасыз. Кипкәч, төссез лак белән буйыйсы гына кала. 

8. Тагын бер кызыклы ысул: кылка­ләмне берьюлы ике төсле буяуга манып ясау. Бу ысул белән чәчәкләр, яфраклар, үсемлек орнаментлары бик матур килеп чыга. Сары белән яшел, кызыл белән алсу, зәңгәр белән ак төсләр үзара килешле. Хәер, кемгә­дер башка төсләр ошарга мөмкин. 

9. Өченче ысул: рәсемне трафарет ысулы белән төшерү. Интернеттан төрле-төрле бизәкләрне эзләп табып, теләсә нинди трафарет ясарга була. 

10. Акрил буяуларның бик тиз кибүен онытмагыз, эшли торган кылкаләм дә гел сулы стаканда торсын. Киемгә тигән буяуны бетерүе кыен, балалар белән бергәләп шөгыльләнергә булсагыз, киемнең буялса да кызганыч булмый торганын кидерегез. 

11. Тәҗрибә туплагач, зуррак ташларны бизәп карарсыз. Алары бакчаны бизәү өчен матур була. Кыскасы, бездән – идея, сездән – гамәл. 

Үз үрнәгеңне җибәр

Загрузка..
Загрузка..
Казан шәһәре Совет районы буенча Россия Пенсия фонды идарәсенең матбугат чаралары белән элемтәләр урнаштыру бүлеге белгече
ТР кеше хокуклары буенча вәкаләтле вәкил
Кукмара районы Камышлы авылы имам-хатыйбы
Татарстан Республикасының Этил спирты һәм алкогольле продукция җитештерүне, әйләнештә йөртүне, сыйфатын дәүләт тикшерүен тәэмин итү һәм кулланучылар хокукларын яклау буенча дәүләт инспекциясенең Казан бүлеге җитәкчесе.
Врач-кардиолог, терапевт, кандидат медицинских наук
Intertat
Татар-информ
Татмедиа
16+
Сделано в iCC Design Group
www.icc-otk.com