Хатын-кызлар өчен татар телендә
бердәнбер әдәби-нәфис журнал
1913 елда чыга башлады
1926–1991 елларда «Азат хатын»

​Yкчәгә кара!

06 июня 2016
1233 карау
Җәй көне хатын-кызның бар җире дә матур булырга тиеш. Ә менә үкчәләр турында күп вакыт онытып та җибәрәбез. Алсу, йомшак үкчәләр — хатын-кызның тагын бер бизәге ләбаса. Матур үкчәләрен ялтыратып атлаган хатын-кыз артыннан үзегез дә сокланып карап каласыздыр әле. Яргаланып һәм каралып беткән үкчә берәүне дә бизәми. Үкчәләрне йомшарту өчен берничә киңәш тәкъдим итәбез. Берәрсен сынап карагыз әле.

! Беренче эш итеп, аякларны ярты сәгать буе сабынлы җылы суда парландырабыз. Суга диңгез тозы яки чәй содасы да кушарга мөмкин. Чәй содасы тирене йомшарта. Аннан соң аякны корытып, түбән­дәге ысулларның берсен сынап карыйбыз.

! 1 йомырка сарысына 1 чәй кашыгы лимон суты һәм 1 аш кашыгы крахмал кушып болгатабыз. Шушыны үкчәгә сылап, кипкәнче тотабыз. Аннан соң аякны җылы суда юып, үкчәгә майлы крем ягабыз.

! Менә бу ысулны куллану да яхшы нәтиҗә бирә. Алоэның зур бер сусыл яфрагын изеп, үкчәгә ябабыз һәм полиэтилен элпә белән урап, өстеннән оекбаш киеп куябыз.
Төнлә шулай йоклыйбыз. Алоэ яраларны бик яхшы төзәтә.

! Телевизор караган арада да вакытны бушка үткәрмибез. Пешкән бәрәңгене кайнар килеш изеп,
шуңа ваклап туралган ярты баш суган белән кәбестә яфрагы куша-быз. Шушы боламыкны ике капка бүлеп салабыз, капны аякка чорнап куябыз. 

! Суганның үзен генә кулланганда да нәтиҗәсе яхшы. Бер баш суганны урталай бүлеп, бер-ике кат кайнар су белән пешекләп алабыз да, шуны үкчәгә бәйләп, йокларга ятабыз. Иртән аякны кырчын таш (пемза) белән ышкып юабыз, майлы крем сылыйбыз. 

! Ваклап туралган канлы үләннән төнгелеккә куелган компресс та файдалы. (Канлы үлән тиредәге гөмбәчекләрне җиңәргә дә булыша.) 

! Каешланган үкчәне эре бөртекле тоз (ә иң яхшысы – диң­гез тозы) кушылган зәйтүн мае белән ышкып карагыз әле. Зәйтүн мае үкчәне йомшарта, ә тоз чистарта. 

! 1-2 алманы уып, 200 г сөт, 1 чәй кашыгы чәй содасы кушып болгатабыз һәм калын итеп үкчәгә ягабыз. Өстеннән бинт һәм полиэтилен элпә белән урап, ярты сәгать тотабыз.

! Бик нык яргаланган үкчәләрне дәвалар өчен ак чыршы (пихта) бәлзәме дә булыша. Аны үкчәгә калын итеп ягып, өстеннән бинт белән урап куярга һәм шул килеш төнгә калдырырга кирәк. 
 
! Пешекләнгән кәбестә яфрагына бал сылап, шуны үкчәгә ябу да бик файдалы. Бал яраларны төзәтсә, кәбестә яфрагы тирене йомшарта. Кәбестә яфрагы булмаса, балның үзен генә ягарга була. 

! Үкчәләр ярылып интектерсә, менә бу рецепт та файдалы булыр: тигез күләмдә парафин, салицил кислотасы һәм балавыз алып, шуны «су мунча­сы»нда эретегез дә, җылы көенчә үкчәгә ягыгыз. Бер каты кипкәч, икенче һәм өченче кат итеп ягарга кирәк. Шуның өстеннән бинт белән урап, йокларга ятыгыз. 
Иртән аякны сабынлы-содалы җылы су белән юып, кырчын таш белән ышкыгыз.

Халык ысуллары нәтиҗәле булса да, үкчә ярылу – организмга А һәм Е витамины җитешмәүне аңлата. Безнең рецептларны куллану белән бергә, өстәлегездә шушы витаминнарга бай ризыклар да күбрәк булсын. А витамины сөттә, йомырка сарысында, балык маенда күп. 

Ә Е витаминына үсемлек майлары, чикләвек һәм бодай ярмасы бик бай. 

Сезнең фикер

Загрузка..
Загрузка..
Казан шәһәре Совет районы буенча Россия Пенсия фонды идарәсенең матбугат чаралары белән элемтәләр урнаштыру бүлеге белгече
ТР кеше хокуклары буенча вәкаләтле вәкил
Кукмара районы Камышлы авылы имам-хатыйбы
Татарстан Республикасының Этил спирты һәм алкогольле продукция җитештерүне, әйләнештә йөртүне, сыйфатын дәүләт тикшерүен тәэмин итү һәм кулланучылар хокукларын яклау буенча дәүләт инспекциясенең Казан бүлеге җитәкчесе.
Врач-кардиолог, терапевт, кандидат медицинских наук
Intertat
Татар-информ
Татмедиа
16+
Сделано в iCC Design Group
www.icc-otk.com