Хатын-кызлар өчен татар телендә
бердәнбер әдәби-нәфис журнал
1913 елда чыга башлады
1926–1991 елларда «Азат хатын»
Баш битХатын-кыз галәмеБелмәсәң - бел! → Озын ялдан соң ничек кабат эшкә керешеп китәргә?

Озын ялдан соң ничек кабат эшкә керешеп китәргә?

Фәнзилә МОСТАФИНА
Фәнзилә МОСТАФИНА
09 января 2018
299 карау
Яллар турында онытып, яңадан гадәти тормыш агымына кушылырга вакыт җитә. Атна-ун көн тик ятканнан соң, ничек кабат җир җимертеп эшли башларга – әлеге язмада шул сорауга җавап табарсыз.

Башта озак ял иткәннән соң эшкә керешүнең ни өчен авырдан бирелүен ачыклыйк. Ял вакытында режим бозыла. Нәрсә телибез – шуны ашыйбыз, кайчан һәм күпме телибез – шуның хәтле йоклыйбыз. Төн утырып телевизор карау да гадәти хәлгә әйләнә. Атна-ун көн шул халәттә яшәгәч, организм моңа күнегә. Аңлашыла ки, мондый ялдан соң иртәнге 7дә торып эшкә бару, кичкә кадәр компьютер каршында утыру авыр йөккә әйләнә. Тик, белгечләр фикеренчә, бу халәтне җиңеп була. Кайбер киңәшләргә генә колак салырга кирәк.

Эш урынына килүгә ат кебек җигелеп эшли башларга тырышмагыз. Барыбер килеп чыкмаячак. Беренче эш көнен хезмәттәшләр белән бәйрәмнең ничек үтүе турында сөйләшеп, өстәлегезне тәртипкә китереп, вак-төяк эшләр башкарып, ешрак тәнәфес ясап уздырыгыз. Кыскасы, эшкә кисәк ыргылып түгел, салмак кына кереп китегез. Билгеле инде, җитәкченең хәлгә керүе кирәк.

Эш урынын тәртипкә китерегез. Компьютерда эшлисез икән, монитордагы «эш өстәле»н кирәксез документ һәм папкалардан чистартыгыз. Эш урынында берәр нәрсәне, әйтик, компьютерның «эш өстәле»ндә торган сурәтне алыштыру да файдага гына. Озак ялдан соң кешегә нинди дә булса үзгәреш кирәк.

Күзләрне йомып, хатирәләргә бирелергә, яхшы вакыйгалар турында уйларга курыкмагыз. Психологлар әйтүенчә, никадәр күбрәк яхшы вакыйга исегезгә төшерсәгез, энергиягез шулкадәр артачак кына.

Бәйрәмнәрдән соң туклануга икеләтә зур игътибар бирергә кирәк. Организмны чистарту мәслихәт. Тик эшкә чыкканның беренче көненнән үк кырыс диетага утырырга ашыкмагыз. Белгечләр серотонин бүлеп чыгара торган ризыкларны рационга күбрәк кушарга киңәш итә: шоколад, зефир, креветка һәм башка диңгез ризыклары, чикләвек, кипкән җиләк-җимеш, эремчек һәм кефир. Ә менә кофены сирәгрәк эчәргә кирәк.

Йокыны да көйләү зарур. Иртә тору өчен иртә ятарга кирәк. Ятар алдыннан телевизор карамагыз, аның урынына 10-15 минут урамда йөреп керегез. Яшел чәй яки бер кашык бал болгаткан кайнар сөт эчсәң, аннары җылымса ванна керсәң, изрәп йоклаячаксың, дип ышандыра белгечләр. Ә тизрәк уяныр өчен зарядка ясап алырга һәм контраст душ керергә кирәк.

Каникул вакытында берничә килограммга артканыгызны сизсәгез, артык авырлыктан бер көндә генә котылырга ашыкмагыз. Озак ялдан соң эшкә керешү (ул физик эш булса – бигрәк тә) болай да иммун системасын какшата. Шуңа күрә ялдан чыкканның беренче атнасында көн дә спорт залына барырга тырышмагыз, 2-3 тапкыры да җитеп тора.

Статистика буенча, бер ай ялда булганда баш миенең эшчәнлеге 25 процентка кими. Беренче көннән үк авыр эшкә алынырга димәгән, компьютерда уен уйнап алсагыз да була. Уенның акыл эшчәнлеге таләп ителә торганын сайлагыз. Уйнап утыруыгызны җитәкчегезгә ничек итеп аңлатасын гына алдан уйлап куярга онытмагыз.

Беренче эш көннәрендә эленке-салынкы йөрсәгез, үз-үзегезне «мин начар эшче» дип ачуланырга ашыкмагыз. Җитәкче булсагыз, кул астыгызда эшләүчеләрне беренче көннән үк авыр эшкә җикмәгез. Берничә көн шулай йөргәч, организм кире үз халәтенә кайта. Дөрес, кайчан да бер керешермен әле, дип өстерәлеп кенә йөрергә дә ярамый. Организм шул халәткә ияләшергә, нәтиҗәдә яраткан эшегездән колак кагарга да мөмкинсез.

фото: http://pixabay.com

Сезнең фикер

Загрузка..
Загрузка..
ТР кеше хокуклары буенча вәкаләтле вәкил
Матбугат чаралары белән элемтәләр урнаштыру булеге белгече
Кукмара районы Камышлы авылы имам-хатыйбы
Татарстан Республикасының Этил спирты һәм алкогольле продукция җитештерүне, әйләнештә йөртүне, сыйфатын дәүләт тикшерүен тәэмин итү һәм кулланучылар хокукларын яклау буенча дәүләт инспекциясенең Казан бүлеге җитәкчесе.
Врач-кардиолог, терапевт, кандидат медицинских наук
Intertat
Татар-информ
Татмедиа
16+
Сделано в iCC Design Group
www.icc-otk.com